خرطوم،: مغربی سوڈان کے شمالی دارفور صوبے کے دارالحکومت الفشیر میں ریپڈ سپورٹ فورسز (آر ایس ایف) کے فضائی حملے میں 9 بچے ہلاک اور 11 دیگر زخمی ہوگئے۔ایک مقامی مزاحمتی کمیٹی نے یہ اطلاع دی۔

غیر سرکاری گروپ نے پیر کو ایک بیان میں کہا، "ایک آر ایس ایف کے ڈرون نے الفشیر میں التیجانیہ محلے میں الحجرہ مسجد پر گولہ بارود پھینکے، جس سے 9 بچے ہلاک اور 11 زخمی ہو گئے۔”

سوڈان ٹریبیون نیوز پورٹل نے اطلاع دی ہے کہ فضائی حملوں کا نشانہ بننے والی جگہ پر بے گھر افراد کو کھانا فراہم کرنے والا باورچی خانہ چلایا جا رہا تھا۔آر ایس ایف نے ابھی تک اس پر کوئی ردعمل ظاہر نہیں کیا ہے۔

قابل ذکر ہے کہ الفشیر میں 10 مئی سے شدید لڑائی جاری ہے۔ الفشیر میں جاری جنگ 15 اپریل 2023 سے ملک بھر میں آر ایس ایف اور سوڈانی مسلح افواج کے درمیان ایک بڑے تنازعے میں بدل گئی ہے۔

اقوام متحدہ کے دفتر برائے رابطہ برائے انسانی امور (او سی ایچ اے) نے گزشتہ ماہ ایک تازہ ترین رپورٹ میں کہا تھا کہ اس تنازعے میں اب تک 16650 افراد ہلاک ہو چکے ہیں۔

اقوام متحدہ کے بین الاقوامی ادارہ برائے مائیگریشن نے جون کے اوائل میں اندازہ لگایا تھا کہ سوڈان میں کم از کم 7.3 کروڑ افراد جاری تنازعات کی وجہ سے اندرونی طور پر بے گھر ہو چکے ہیں۔

یواین آئی