نیویارک: دسویں مرتبہ توہین عدالت پر سابق امریکی صدر ڈونلڈ ٹرمپ پر پھر جرمانہ عائد کر دیا گیا۔
تفصیلات کے مطابق نیویارک کی عدالت نے سابق صدر ڈونلڈ ٹرمپ کو ایک بار پھر توہین عدالت کا مرتکب قرار دیا، اور مین ہٹن فوجداری مقدمے میں گواہوں اور ججوں کو تحفظ فراہم کرنے والے گیگ آرڈر کی خلاف ورزی کرنے پر 1,000 ڈالر جرمانہ عائد کر دیا۔
عدالت نے جرمانہ کرتے ہوئے ڈونلڈ ٹرمپ کو وارننگ دی کہ اگر آئندہ خلاف ورزی کی تو انھیں جیل بھیج دیا جائے گا، ٹرمپ دسویں مرتبہ توہین عدالت کے مرتکب ہوئے تھے۔ دراصل جج نے ٹرمپ کو گواہوں اور کیس میں ملوث دیگر افراد پر تنقید کرنے سے روکنے کے لیے گیگ آرڈر نافذ کیا تھا۔
جج جوآن مرچن نے کہا کہ جرمانے کے اثرات دکھائی نہیں دے رہے ہیں، اس لیے وہ ٹرمپ کو جیل بھیجنے پر مجبور ہوں گے، تاہم ایسا کرنے پر کیس کی عدالتی کارروائیوں میں خلل پڑ جائے گا۔ جج نے کہا کہ صرف یہی نہیں، میں اس لیے بھی فکرمند ہوں کہ اس اقدام کے لیے عدالتی افسران، سیکرٹ سروس اور مختلف دیگر اہلکاروں کی خدمات لینی پڑیں گی، لیکن آخرکار مجھے یہ کرنا ہی پڑے گا۔
جب جج نے اپنا حکم سنایا تو ٹرمپ اپنے بیٹے ایرک ٹرمپ کے ساتھ کمرے میں بازو باندھ کر بینچ پر بیٹھ گئے تھے۔
واضح رہے کہ ڈونلڈ ٹرمپ کے خلاف ’ہش منی کیس‘ کی کارروائی جاری ہے، ٹرمپ پر الزام ہے کہ انھوں نے 2016 کے صدارتی انتخابات کے موقع پر اپنی ذاتی زندگی سے متعلق خبریں چھپانے کے لیے چالیں چلی تھیں، اور رشوت دی تھی۔ ان پر ایک فلمی اداکارہ کو چُپ رہنے کے لیے دی جانے والی رقم کو چھپانے کے لیے جعلی کاروباری ریکارڈ بنانے کا الزام ہے۔