، سری نگر،25 فروری/ جنوبی کشمیر کے ضلع شوپیاں کے امشی پورہ علاقے میں جمعے کی صبح سیکورٹی فورسز اور جنگجوؤں کے درمیان تصادم میں دو عدم شناخت جنگجو مارے گئے جبکہ آپریشن ہنوز جاری ہے۔
ایک پولیس ترجمان نے کہا کہ شوپیاں کے امشی پورہ میں تصادم آرائی کے دوران دو جنگجو مارے گئے۔انہوں نے کہا کہ مہلوک جنگجوؤں کی تحویل سے اسلحہ و گولہ باردو کے علاوہ قابل اعتراض مواد بھی بر آمد کیا گیا۔
ان کا مزید کہنا تھا کہ علاقے میں تلاشی آپریشن ہنوز جاری ہے۔قبل ازیں سرکاری ذرائع نے بتایا کہ جنگجوؤں کے چھپنے کی اطلاع موصول ہونے پر پولیس، فوج اور سی آر پی ایف کی ایک مشترکہ ٹیم نے شوپیاں کے امشی پورہ علاقے کو محاصرے میں لے کر تلاشی آپریشن شروع کر دیا۔
انہوں نے کہا کہ جوں ہی تلاشی آپریشن کی ایک ٹیم ایک مشتبہ مقام کے نزدیک پہنچی تو وہاں چھپے جنگجوؤں نے اس پر فائرنگ شروع کر دی جس کے نتیجے میں طرفین کے درمیان تصادم چھڑ گیا۔
یو این آئی
