کشمیر میں خشک موسم کے بیچ برف و باراں کی پیش گوئی، فضائی ٹریفک متاثر ہونے کی توقع

سری نگر،22   فروری :وادی کشمیر میں محکمہ موسمیات کی برف باراں کی پیش گوئی کے بیچ  مطلع ابر آلود رہنے سے شبانہ درجہ حرارت میں نمایاں اضافہ درج ہوا ہے۔
محکمہ موسمیات کی ایک پیش گوئی کے مطابق وادی کشمیر میں اگلے 48 گھنٹوں کے دوران برف باری یا بھاری بارشیں ہوسکتی ہیں۔
متعلقہ محکمے کے ایک ترجمان نے بتایا کہ وادی کشمیر میں 22 فروری کی شام سے ہی موسم کروٹ بدل سکتا ہے جس کے باعث موسم 28 فروری تک خراب رہے گا جس دوران برف باری یا بھاری بارشیں متوقع ہیں۔
انہوں نے بتایا کہ وادی میں 25 اور 26 فروری کو برف باری یا بھاری بارشوں  کے باعث فضائی ٹریفک کی نقل و حمل متاثر ہوسکتی ہے۔
ادھر وادی میں مطلع ابر آلود رہنے سے شبانہ درجہ حرارت میں نمایاں اضافہ درج ہوا ہے اور وادی کے مشہور سیاحتی مقامات گلمرگ اور پہلگام میں 75 روز بعد شبانہ درجہ حرارت نقطہ انجماد سے اوپر درج ہوا ہے۔
محکمہ موسمیات کے ایک ترجمان کے مطابق مشہور زمانہ سیاحتی مقام گلمرگ میں گذشتہ شب کا کم سے کم درجہ حرارت 0.6 ڈگری سینٹی گریڈ جبکہ پہلگام میں گذشتہ شب کا کم سے کم درجہ حرارت 1.2 ڈگری سینٹی گریڈ ریکارڈ ہوا ہے۔
گرمائی دارلحکومت سری نگر میں گذشتہ شب کا کم سے کم درجہ حرارت منفی 5.8 ڈگری سینٹی گریڈ ریکارڈ کیا گیا۔
بتادیں کہ سری نگر میں 31  جنوری کی شب رواں سیزن کی سرد ترین رات درج ہوئی تھی جب  کم سے کم درجہ حرارت منفی 8.8 ڈگری سینٹی گریڈ ریکارڈ ہوا تھا جس سے سردیوں کو تیس سالہ پرانا ریکارڈ ٹوٹ گیا تھا۔
قبل ازیں سری نگر میں رواں سیزن کے دوران 14 جنوری کو سرد ترین رات درج ہوئی تھی جب کم سے کم درجہ حرارت منفی 8.4 ڈگری ریکارڈ ہوا تھا اور سردیوں کا  پچیس سالہ پرانا ریکارڈ ٹوٹ گیا تھا۔
سرحدی ضلع کپوارہ میں کم سے کم درجہ حرارت 4.0 ڈگری سینٹی گریڈ جبکہ قاضی گنڈ میں 3.0 ڈگری سینٹی گریڈ اور ککر ناگ میں کم سے کم درجہ حرارت 4.0 ڈگری سینٹی گریڈ ریکارڈ ہوا ہے۔
دریں اثنا وادی میں پیر کے روز موسم دن بھر خشک مگر ابر آلود  رہا جس سے لوگوں کو قدرے سردی محسوس ہوئی۔
لداخ یونین ٹریٹری کے ضلع لیہہ میں کم سے کم درجہ حرارت منفی 2.3 ڈگری سینٹی گریڈ جبکہ ضلع کرگل میں منفی 8.4 ڈگری سینٹی گریڈ اور قصبہ دراس میں منفی 9.0 ڈگری سینٹی گریڈ ریکارڈ ہوا ہے۔