نوئیڈا انتطامیہ نے دہلی سے نوئیڈا جانے والے لوگوں کا ’کورونا ریپڈ اینٹی جن ٹیسٹ‘ کرنے کا فیصلہ کیا گیا ہے، انتظامیہ کا کہنا ہے کہ اس سے کورونا انفیکشن کو دہلی سے یوپی میں داخل ہونے سے روکا جا سکے گا
ضلع مجسٹریٹ سہاس ایل وائی نے انتظامیہ کے اعلیٰ افسران کے ساتھ تازہ حالت پر آن لائن اجلاس طلب کیا، جس میں محکمہ صحت کے متعدد افسران نے شرکت کی۔ اسی اجلاس میں فیصلہ لیا گیا کہ نوئیڈا سے ملحقہ تمام سرحدوں پر رینڈم (بے ترتیب) سیمپل لئے جائیں گے اور ان کا کورونا کے لئے ٹیسٹ کیا جائے گا۔
نوئیڈا محکمہ صحت کی ٹیمیں دہلی بارڈر پر تعینات رہ کر لوگوں کی رینڈم سیمپلنگ کریں گی تاکہ ٹریفک میں رکاوٹ پیدا نہ ہو۔ اس کے لئے میور وہار-نوئیڈا بارڈر، کالندی کنج، کونڈلی اور نیو اشوک نگر پر محکمہ صحت کی ٹیمیں تعینات رہیں گی۔ اس کے علاوہ نوئیڈا سٹی سینٹر، نوئیڈا سیکٹر 16، سیکٹر 18 وغیرہ میٹرو اسٹیشنوں پر بھی ٹیسٹنگ کے لئے محکمہ صحت کی ٹیمیں تعینات رہیں گی۔
واضح رہے کہ اب تک نوئیڈا میں 20566 کورونا کے معاملے درج کیے گئے ہیں، جس میں سے یکم نومبر سے لے کر 17 نومبر تک سب سے زیادہ 2727 نئے معاملے سامنے آئے ہیں۔ وہیں دہلی میں اس مہینے حیرت انگیز طریقہ سے معاملوں میں تیزی آئی ہے۔ منگل کی شام تک دہلی میں گزشتہ 24 گھنوں میں 6396 نئے کورونا کے معاملے درج کیے گئے وہیں 99 لوگوں کی موت واقع ہوئی۔ اس کے ساتھ ہی دہلی میں اب تک کورونا کے مجموعی کیسز کی تعداد 495595 ہو چکی ہے۔
