عوامی اتحاد برائے گپکار اعلامیہ نے ٹویٹر پر اپنا کھاتہ کھول دیا ہے

سری نگر،// عوامی اتحاد برائے گپکار اعلامیہ نے مائیکرو بلاگنگ کی ویب سائٹ ٹویٹر پر اپنا کھاتہ کھول لیا ہے۔
عوامی اتحاد کے ٹویٹر کھاتے سے بدھ کو کی گئی پہلی ٹویٹ میں کہا گیا: ‘یہ پیپلز الائنس فار گپکار ڈیکلریشن کا آفیشل ٹویٹر اکائونٹ ہے’۔
اس ٹویٹ کو عوامی اتحاد کی نائب صدر محبوبہ مفتی، نیشنل کانفرنس کے نائب صدر عمر عبداللہ اور عوامی اتحاد کے ترجمان سجاد غنی لون سمیت متعدد لیڈران اور سیاسی جماعتوں نے ری ٹویٹ کیا۔
عمر عبداللہ نے لکھا: ‘پیپلز الائنس نے ٹویٹر پر اپنا کھاتہ کھول لیا ہے۔ ہم اس ہینڈل کی ٹویٹر سے توثیق کے لئے کوشاں ہیں۔ یہاں یہ بتانا ضروری ہے کہ یہ اتحاد کا آفیشل ٹویٹر ہینڈل ہے’۔
بتادیں کہ عوامی اتحاد برائے گپکار اعلامیہ نے 7 نومبر کو ایک غیر معمولی فیصلہ لیتے ہوئے جموں و کشمیر میں ڈی ڈی سی کے انتخابات متحد ہو کر لڑنے کا اعلان کیا۔
اتحاد نے بھارتیہ جنتا پارٹی (بی جے پی) کا نام لئے بغیر کہا تھا کہ وہ تفرقہ انگیز قوتوں کو جمہوری سپیس پر حملہ آور ہونے کی اجازت نہیں دے سکتے ہیں۔
قابل ذکر ہے کہ مرکزی حکومت کی جانب سے پانچ اگست 2019 کو جموں و کشمیر کی خصوصی آئینی حیثیت کی منسوخی سے ایک روز قبل بی جے پی کو چھوڑ کر باقی تمام جماعتوں کے رہنما فاروق عبداللہ کی گپکار رہائش گاہ پر جمع ہوئے تھے اور ‘گپکار اعلامیہ’ جاری کیا تھا۔
اعلامیے کے مطابق تمام سیاسی جماعتوں نے اس بات پر اتفاق کیا تھا کہ اگر مرکزی حکومت کی جانب سے دفعہ 370 اور دفعہ 35 اے کو ختم یا ریاست کو تقسیم کرنے کی کوئی کوشش کی جاتی ہے تو اس کے خلاف متحدہ طور پر جدوجہد کی جائے گی۔
اعلامیے کے دستخط کنندگان میں نیشنل کانفرنس صدر فاروق عبداللہ، پی ڈی پی صدر محبوبہ مفتی، جموں وکشمیر پردیش کانگریس صدر غلام احمد میر، سی پی آئی (ایم) کے سینئر لیڈر محمد یوسف تاریگامی، جموں وکشمیر پیپلز کانفرنس کے چیئرمین سجاد غنی لون، جموں و کشمیر عوامی نیشنل کانفرنس کے نائب صدر مظفر شاہ وغیرہ شامل ہیں۔
یو این آئی