ایشین میل نیوز ڈیسک
سری نگر:: سری نگر اور پاکستان زیر انتظام کشمیر کی راجدھانی مظفر آباد کے درمیان چلنے والی کاروان امن بس سروس پیر کے روز آٹھ ہفتوں کی معطلی کے بعد بحال ہوئی۔
یاد رہے کہ کاروان امن بس سروس شمالی کشمیر کے اوڑی میں واقع کمان امن سیتو پل پر مرمت کا کام جاری رہنے کی وجہ سے آٹھ ہفتوں تک لگاتار معطل رہی۔
سرکاری ذرائع نے بتایا کہ پیر کی صبح ہفتہ وار کاروان امن بس سروس پاکستان زیرانتطام کشمیر کے تین مسافروں کو لے کر سری نگر سے کمان پوسٹ کی طرف روانہ ہوئی۔
انہوں نے بتایا کہ پیرکے روز بس سروس کے ذریعے سفر کرنے والوں کی صحیح تعداد شام کو ہی معلوم ہوسکتی ہے۔ادھر جموں کشمیر اور پاکستان زیر انتظام کشمیر کے درمیان ایل او سی آر پار تجارت 18 اپریل سے لگاتار معطل ہے۔
قابل ذکر ہے کہ سری نگر اور مظفرآباد کے درمیان چلنے والی ہفتہ وار بس سروس کا آغاز 7 اپریل 2005 کو ہوا تھا اور تب سے اس کے ذریعے ہزاروں لوگ آرپار اپنے عزیز واقارب سے ملے ہیں۔
