پیر, نومبر 16, 2026
11.7 C
Srinagar

فوڈ سیفٹی پر کوئی سمجھوتہ نہیں، خلاف ورزی کرنے والوں کے خلاف سخت کارروائی ہوگی: سکینہ ایتو

سری نگر: جموں و کشمیر کی وزیر صحت و طبی تعلیم سکینہ ایتو نے اتوار کو کہا کہ غذائی تحفظ پر کوئی سمجھوتہ نہیں کیا جائے گا اور فوڈ سیفٹی معیارات کی خلاف ورزی کرنے والوں کے خلاف قانون کی پوری طاقت کے ساتھ کارروائی ہوگی۔ بڈگام ریلوے اسٹیشن پر حال ہی میں سڑا ہوا گوشت ضبط کیے جانے کے بعد حکومت نے نفاذ کی کارروائیاں تیز کرنے کا اعلان کیا ہے۔

سماجی رابطے کی ویب سائٹ ایکس پر ایک پوسٹ میں وزیر نے کہا کہ خلاف ورزیوں پر سخت کارروائی ہوگی اور جواب دہی یقینی بنائی جائے گی۔ انہوں نے لکھا: ’’عوامی صحت کو خطرے میں ڈالنے والی سرگرمیوں کے لیے زیرو ٹالرنس ہے۔‘‘ ان کا کہنا تھا کہ لوگوں کی صحت کا تحفظ حکومت کی اولین ترجیح ہے۔

انہوں نے بتایا کہ فوڈ اینڈ ڈرگ ایڈمنسٹریشن (ایف ڈی اے) نے جموں و کشمیر بھر میں گوشت کے 85 یونٹوں کا معائنہ کیا ہے، 16 نوٹس جاری کیے ہیں اور 11 معاملات قانونی کارروائی کے لیے تجویز کیے ہیں۔

ایف ڈی اے کے ایک بیان کے مطابق یہ خصوصی مہم بڈگام ریلوے اسٹیشن پر 1,600 کلو گرام منجمد بھینس کا گوشت ضبط کر کے تلف کیے جانے کے بعد شروع کی گئی۔ فوڈ سیفٹی اینڈ اسٹینڈرڈز ایکٹ 2006 کی دفعہ 32 کے تحت 16 اصلاحی نوٹس جاری کیے گئے، جن میں متعلقہ آپریٹروں کو ہدایت دی گئی کہ وہ صفائی ستھرائی کی خامیاں مقررہ مدت کے اندر دور کریں۔ 11 معاملات ایکٹ کی دفعہ 56 کے تحت کارروائی کے لیے تجویز کیے گئے ہیں، جس میں غیر صحت بخش اور گندے ماحول میں خوراک تیار کرنے پر ایک لاکھ روپے تک جرمانے کی گنجائش ہے۔ مزید چار معاملات میں راضی نامہ کر کے مجموعی طور پر 4,000 روپے جرمانہ وصول کیا گیا۔

ایف ڈی اے نے منجمد گوشت اور گوشت مصنوعات کا کاروبار کرنے والے تمام آپریٹروں کو ہدایت دی ہے کہ وہ صفائی ستھرائی کا خیال رکھیں، مقررہ درجہ حرارت پر ذخیرہ اندوزی اور نقل و حمل یقینی بنائیں، سپلائی چین میں کولڈ چین برقرار رکھیں اور لیبلنگ کے ضوابط پر عمل کریں۔ صارفین سے اپیل کی گئی ہے کہ وہ غیر محفوظ یا ملاوٹ شدہ خوراک کی اطلاع دیں۔

قابل ذکر ہے کہ بڈگام میں گوشت کی ضبطی پر سخت ردعمل سامنے آیا ہے۔ کشمیر کے میرواعظ عمر فاروق نے اتوار کو کہا کہ گزشتہ سال عوامی غم و غصے اور حکام کی یقین دہانیوں کے باوجود ایسی سرگرمیاں بدستور جاری دکھائی دیتی ہیں۔ انہوں نے مطالبہ کیا کہ حکومت تمام حقائق عوام کے سامنے رکھے اور جواب دہی طے کرے۔ یہ ضبطی 2025 کے گوشت اسکینڈل کے ایک سال بعد عمل میں آئی ہے، جس میں جموں و کشمیر بھر میں چھاپوں کے دوران تقریباً 12,000 کلو گرام گوشت برآمد ہوا تھا اور معاملہ ہائی کورٹ تک پہنچا تھا۔

Popular Categories

spot_imgspot_img