ادھم پور: مسلسل بارشوں کے باعث جمعہ کی علی الصبح جموں و کشمیر کے ضلع ادھم پور کے برکوانڈا علاقے میں اچانک سیلاب آ گیا، جس کے نتیجے میں کئی مکانات کو نقصان پہنچا جبکہ انتظامیہ نے متاثرہ خاندانوں کو محفوظ مقامات پر منتقل کر دیا۔
حکام نے بتایا کہ شدید بارش کے باعث پانی کی سطح اچانک بلند ہونے سے علاقے میں خوف و ہراس پھیل گیا۔سیلابی ریلے نے برکوانڈا کے نشیبی علاقوں میں واقع گھروں کو اپنی لپیٹ میں لے لیا اور گھریلو سامان بھی بہا لے گیا۔
ایک سرکاری افسر نے بتایا، "کئی مکانات کو نقصان پہنچا ہے۔ احتیاطی اقدام کے طور پر حساس علاقوں میں رہائش پذیر خاندانوں کو محفوظ مقامات پر منتقل کر دیا گیا ہے۔”
واقعے کے فوراً بعد پولیس، ایس ڈی آر ایف اور مقامی انتظامیہ کی ٹیمیں موقع پر پہنچ گئیں اور ریسکیو و امدادی کارروائیاں شروع کر دیں۔ نقصانات کا جائزہ لینے کا عمل بھی جاری ہے۔
اب تک کسی جانی نقصان کی اطلاع موصول نہیں ہوئی ہے۔ حکام نے ندی نالوں اور سیلاب سے متاثر ہونے والے علاقوں کے رہائشیوں کو مسلسل بارش کے پیش نظر چوکس رہنے کی ہدایت دی ہے۔ (جی این ایس)
