محکمہ موسمیات کی 28 سے 30 جولائی تک ایک نئے بارش کے سلسلے کی پیش گوئی، عوام سے احتیاط برتنے اور سرکاری ہدایات پر عمل کرنے کی اپیل
سرینگر، 24 جولائی: محکمہ موسمیات جموں و کشمیر کے علاقائی مرکز سرینگر نے کہا ہے کہ موجودہ بارشوں کا سلسلہ جمعہ کو سہ پہر تک وقفے وقفے سے جاری رہنے کا امکان ہے، تاہم اس کے بعد موسم میں بتدریج بہتری آنے کی توقع ہے۔ محکمہ کے مطابق اگرچہ آئندہ چند روز کے دوران بعض مقامات پر مختصر دورانیے کی بارشیں متوقع ہیں، تاہم فی الحال کسی بڑے موسمی نظام کی پیش گوئی نہیں کی گئی، جس سے مجموعی صورتحال میں بہتری کی امید پیدا ہوئی ہے۔
محکمہ موسمیات کے مطابق آج صبح سے سہ پہر تک جموں و کشمیر کے متعدد علاقوں میں ہلکی سے درمیانی درجے کی بارش یا بوندا باندی کا سلسلہ جاری رہ سکتا ہے، جس کے بعد موسم نسبتاً بہتر ہونے کا امکان ہے۔ 25 سے 27 جولائی کے دوران چند مقامات پر مختصر دورانیے کی بارش یا گرج چمک کے ساتھ بادل برسنے کا امکان برقرار رہے گا، جبکہ 28 سے 30 جولائی کے دوران ایک نیا بارش کا سلسلہ جموں و کشمیر کو متاثر کر سکتا ہے۔
گزشتہ 24 گھنٹوں کے دوران صوبہ جموں میں سب سے زیادہ بارش ادھم پور میں 96.5 ملی میٹر ریکارڈ کی گئی۔ اس کے علاوہ بٹوت میں 84.2 ملی میٹر، رام بن میں 69.5 ملی میٹر، بھدرواہ میں 65.7 ملی میٹر، کٹرا میں 45.1 ملی میٹر، کٹھوعہ میں 44.8 ملی میٹر، ڈوڈہ میں 35 ملی میٹر، ریاسی میں 27.5 ملی میٹر، کشتواڑ میں 27 ملی میٹر اور جموں شہر میں 25.2 ملی میٹر بارش ریکارڈ کی گئی۔
وادی کشمیر میں گزشتہ 24 گھنٹوں کے دوران ویرناگ میں 45.6 ملی میٹر، قاضی گنڈ میں 40.2 ملی میٹر، کوکرناگ میں 39.3 ملی میٹر، کلگام میں 28.4 ملی میٹر، پہلگام میں 25.4 ملی میٹر، بٹکوٹ میں 14.5 ملی میٹر، کھڈونی میں 14 ملی میٹر، سنگم میں 13 ملی میٹر، پلوامہ میں 12.5 ملی میٹر، گلمرگ میں 10.6 ملی میٹر، شوپیاں میں 8 ملی میٹر، سونہ مرگ اور باباپورہ میں 7، پانپور میں 6، لولاب میں 3.4، بمہامہ کپوارہ میں 3، اونتی پورہ میں 2.2، بارہمولہ میں 1.5، بڈگام میں ایک، سری نگر، سری نگر ہوائی اڈہ، گاندربل اور کپوارہ میں 0.5 سے 0.6 ملی میٹر بارش ریکارڈ کی گئی، جبکہ بعض مقامات پر نہ ہونے کے برابر بارش درج کی گئی۔
محکمہ موسمیات کا کہنا ہے کہ اگرچہ جنوبی کشمیر کے بعض علاقوں میں گزشتہ شب کے بعد دوبارہ بارش ہوئی ہے، تاہم دریائے جہلم میں پانی کی سطح مسلسل نیچے آ رہی ہے، جس کے باعث وادی میں بڑے سیلاب کے خدشات میں نمایاں کمی آئی ہے۔ اس کے باوجود پہاڑی اضلاع اور حساس علاقوں میں مقامی سطح پر اچانک سیلاب، لینڈ سلائیڈنگ، مٹی کے تودے گرنے اور شوٹنگ اسٹونز کے امکانات کو مکمل طور پر مسترد نہیں کیا جا سکتا۔
محکمہ نے عوام، بالخصوص پہاڑی اور حساس علاقوں میں رہنے والے افراد سے اپیل کی ہے کہ وہ موسم اور ٹریفک سے متعلق سرکاری ہدایات پر عمل کریں، غیر ضروری سفر سے گریز کریں اور کسی بھی ہنگامی صورتحال میں متعلقہ انتظامیہ کی جانب سے جاری مشوروں کو ترجیح دیں۔ محکمہ کے مطابق آئندہ چند گھنٹوں کے دوران موسم میں بتدریج بہتری کی توقع ہے، تاہم 28 جولائی سے ایک نئے بارش کے سلسلے کے امکانات کے پیش نظر صورتحال پر مسلسل نظر رکھی جا رہی ہے۔
