شدید سے انتہائی شدید بارش، سیلابی ریلوں، لینڈ سلائیڈنگ اور دریاؤں میں طغیانی کا خدشہ؛ عوام کو غیر ضروری سفر سے گریز کی ہدایت
سری نگر، : محکمہ موسمیات نے جموں و کشمیر کے مختلف علاقوں میں شدید موسمی صورتحال کے پیش نظر ریڈ الرٹ جاری کرتے ہوئے خبردار کیا ہے کہ 23 جولائی تک شدید سے انتہائی شدید بارشوں کا سلسلہ جاری رہنے کا امکان ہے، جس کے باعث اچانک سیلاب (فلیش فلڈ)، لینڈ سلائیڈنگ، مٹی کے تودے گرنے، دریاؤں اور ندی نالوں میں طغیانی اور نشیبی علاقوں میں پانی جمع ہونے جیسے خطرات پیدا ہو سکتے ہیں۔
محکمہ موسمیات کے ڈائریکٹر مختار احمد نے پیر کو بتایا کہ موسم کی سرگرمیوں میں مسلسل اضافے کے پیش نظر پہلے ہی ایڈوائزری جاری کی جا چکی ہے۔ انہوں نے کہا کہ جموں ڈویژن کے پیر پنجال پہاڑی سلسلے میں سب سے زیادہ بارش متوقع ہے، جہاں کئی مقامات پر شدید جبکہ بعض علاقوں میں انتہائی شدید بارش ہونے کا امکان ہے۔
انہوں نے کہا کہ پیر کی صبح وادی کشمیر کے مختلف علاقوں میں بھی اچھی بارش ریکارڈ کی گئی، جبکہ آئندہ چند روز کے دوران مزید بارشوں کی پیش گوئی ہے۔
مختار احمد کے مطابق منگل کے روز وادی کشمیر میں بالخصوص علی الصبح اور صبح کے اوقات میں درمیانی سے شدید بارش متوقع ہے، جبکہ جموں ڈویژن کے مختلف اضلاع میں اسی دوران شدید سے انتہائی شدید بارش کا امکان ہے۔
انہوں نے کہا کہ منگل اور بدھ کے دوران بارشوں کی شدت برقرار رہے گی، جبکہ جنوبی کشمیر اور اس سے ملحقہ علاقوں میں بھی درمیانی سے شدید بارش متوقع ہے۔ بعض مقامات پر مختصر دورانیے کے دوران موسلا دھار بارش ہو سکتی ہے، جس سے صورتحال مزید سنگین ہونے کا اندیشہ ہے۔
محکمہ موسمیات کے ڈائریکٹر نے خبردار کیا کہ شدید بارشیں مختصر وقت میں نشیبی علاقوں میں سیلابی صورتحال پیدا کر سکتی ہیں، جبکہ فلیش فلڈ، دریاؤں اور ندی نالوں میں طغیانی، لینڈ سلائیڈنگ اور مٹی کے تودے گرنے کے خطرات بھی نمایاں طور پر بڑھ جائیں گے، خصوصاً پہاڑی اضلاع میں۔
انہوں نے سیاحوں، ٹرانسپورٹروں اور عام شہریوں پر زور دیا کہ وہ غیر ضروری سفر سے گریز کریں، انتہائی احتیاط برتیں اور ضلعی انتظامیہ کی جانب سے جاری کردہ ہدایات پر سختی سے عمل کریں تاکہ کسی بھی ناخوشگوار واقعے سے بچا جا سکے۔
مختار احمد نے کسانوں کو بھی مشورہ دیا کہ آئندہ تین سے چار روز تک آبپاشی اور کھیتی باڑی سے متعلق دیگر سرگرمیاں عارضی طور پر ملتوی رکھیں۔
انہوں نے بتایا کہ گزشتہ 48 گھنٹوں کے دوران مسلسل بارشوں کے باعث جموں و کشمیر کے بعض اضلاع کے لیے ریڈ الرٹ جاری کیا گیا ہے، جبکہ جنوبی کشمیر، وسطی کشمیر کے بعض علاقوں اور شمالی کشمیر کے کچھ حصوں کے لیے اورنج الرٹ نافذ کیا گیا ہے۔
محکمہ موسمیات کے مطابق جموں، کٹھوعہ، ریاسی، کشتواڑ، رام بن، راجوری اور پونچھ اضلاع کے لیے ریڈ الرٹ جاری کیا گیا ہے، جبکہ جنوبی اور وسطی کشمیر کے لیے اورنج الرٹ نافذ رہے گا۔
محکمہ موسمیات کے ڈائریکٹر نے کہا کہ مجموعی طور پر وادی کشمیر اور جموں ڈویژن میں 23 جولائی تک موسم خراب رہنے کا امکان ہے، جس کے بعد موسمی صورتحال میں بتدریج بہتری آنے کی توقع ہے۔
