فٹبال ورلڈ کپ: انگلینڈ اور ناروے کوارٹر فائنل میں، میکسیکو اور برازیل ٹورنامنٹ سے باہر ہو گئے

فیفا فٹبال ورلڈ کپ 2026 کے ناک آؤٹ مرحلے میں انگلینڈ اور ناروے نے سنسنی خیز کامیابیاں حاصل کرتے ہوئے کوارٹر فائنل کے لیے کوالیفائی کر لیا، جبکہ میزبان میکسیکو اور پانچ بار کا عالمی چیمپیئن برازیل ایونٹ سے باہر ہو گئے۔

میکسیکو سٹی میں کھیلے گئے پری کوارٹر فائنل میں انگلینڈ نے میزبان میکسیکو کو 3-2 سے شکست دی۔ انگلینڈ کی جانب سے جوڈ بیلنگھم نے 36ویں اور 38ویں منٹ میں دو تیز رفتار گول کر کے ٹیم کو 2-0 کی برتری دلائی۔ میکسیکو کے جولیان کوئنونیس نے 42ویں منٹ میں گول کر کے خسارہ کم کیا۔ دوسرے ہاف میں انگلینڈ کے جیرل کوانساہ کو 54ویں منٹ میں ریڈ کارڈ دکھایا گیا، تاہم ہیری کین نے 60ویں منٹ میں پنالٹی پر گول کر کے اسکور 3-1 کر دیا۔ میکسیکو کے راؤل خیمنیز نے 69ویں منٹ میں پنالٹی کے ذریعے دوسرا گول کیا، لیکن انگلینڈ نے برتری برقرار رکھتے ہوئے کوارٹر فائنل میں جگہ بنا لی۔

دوسری جانب میٹ لائف اسٹیڈیم میں ناروے نے برازیل کو 2-1 سے شکست دے کر تاریخ میں پہلی بار فیفا ورلڈ کپ کے کوارٹر فائنل میں رسائی حاصل کی۔ ناروے کے اسٹار اسٹرائیکر ارلنگ ہالینڈ نے 79ویں اور 90ویں منٹ میں دو گول اسکور کیے، جبکہ برازیل کی جانب سے نیمار نے اضافی وقت میں پنالٹی پر واحد گول کیا، جو برازیل کو شکست سے نہ بچا سکا۔ پہلے ہاف میں ناروے کے گول کیپر اوریان نیلانڈ نے برونو گیمارائش کی پنالٹی بھی بچائی، جو میچ کا اہم موڑ ثابت ہوئی۔

ان نتائج کے بعد کینیڈا، میکسیکو اور برازیل ٹورنامنٹ سے باہر ہو چکے ہیں، جبکہ میزبان ممالک میں اب صرف امریکہ باقی رہ گیا ہے، جس کا پری کوارٹر فائنل میں مقابلہ 7 جولائی کو بیلجیئم سے ہوگا۔ انگلینڈ اب کوارٹر فائنل میں ناروے کا سامنا کرے گا۔