اونتی پورہ،: نشہ مُکت جموں و کشمیر ابھیان کے تحت منشیات فروشوں کے خلاف اپنی کارروائیاں جاری رکھتے ہوئے، اونتی پورہ پولیس نے ایک بدنام زمانہ منشیات فروش منظور میر عرف "منِ ٹائیگر” ساکن کدل بل، پانپور کی تقریباً 1.20 کروڑ روپے مالیت کی دو منزلہ رہائشی عمارت کو این ڈی پی ایس ایکٹ کی دفعہ 68-ایف کے تحت ضبط کر لیا۔
یہ جائیداد پانپور پولیس اسٹیشن کی جانب سے سینئر افسران کی نگرانی میں کی گئی تحقیقات کے دوران غیر قانونی طور پر حاصل شدہ قرار دی گئی۔ تفتیش سے معلوم ہوا کہ مذکورہ جائیداد منشیات اور نفسیاتی اثرات رکھنے والے ممنوعہ مادّوں کی غیر قانونی خرید و فروخت سے حاصل ہونے والی آمدنی سے بنائی گئی تھی۔
ملزم منشیات کی اسمگلنگ اور نارکوٹکس سے متعلق متعدد ایف آئی آرز میں ملوث ہے۔ تحقیقات کے مطابق ضبط شدہ جائیداد اس کے غیر قانونی منشیات کے کاروبار سے حاصل شدہ آمدنی کا نتیجہ ہے۔
یہ کارروائی اونتی پورہ پولیس کے اس پختہ عزم کی عکاس ہے کہ منشیات کے ناسور کا خاتمہ کیا جائے اور منشیات فروشوں کے مالیاتی نیٹ ورک کو توڑا جائے۔ جرائم سے حاصل شدہ آمدنی سے بنائے گئے اثاثوں کو نشانہ بنا کر پولیس کا مقصد منشیات کی اسمگلنگ میں ملوث عناصر کی حوصلہ شکنی کرنا اور منشیات سے پاک معاشرے کے قیام کی کوششوں کو مزید مضبوط بنانا ہے۔
مقامی عوام نے اونتی پورہ پولیس کی اس کارروائی کو سراہتے ہوئے اسے نشہ مُکت جموں و کشمیر ابھیان کے تحت منشیات کی اسمگلنگ پر قابو پانے اور نوجوان نسل کو نشہ آور مادّوں کے مضر اثرات سے محفوظ رکھنے کی جانب ایک اہم قدم قرار دیا ہے۔
