سری نگر: جموں و کشمیر پولیس نے ہفتہ کے روز ممنوعہ تنظیم جماعت اسلامی کے خلاف غیر قانونی سرگرمیاں (روک تھام) ایکٹ (یو اے پی اے) کے تحت درج مقدمے کے سلسلے میں سوپور سب ڈویژن میں 15 مقامات پر تلاشی مہم چلائی۔
پولیس کے مطابق یہ تلاشی سوپور پولیس تھانے میں سال 2025 میں یو اے پی اے ایکٹ کی دفعات 10 اور 13 کے تحت درج ایف آئی آر کے سلسلے میں کی گئی۔ تلاشی مہم سوپور کے جامعہ قدیم، نسیم باغ، کرانکشیون، ترجو، امرگڑھ، وارپورہ، بومائی، بوئٹنگو اور دیگر علاقوں سمیت 15 سے زائد مقامات پر چلائی گئی۔
پولیس نے بتایا کہ یہ تلاشی نامزد یو اے پی اے عدالت سے باقاعدہ سرچ وارنٹ حاصل کرنے کے بعد کی گئی اور یہ کارروائی ایگزیکٹو مجسٹریٹس اور آزاد گواہوں کی موجودگی میں قانونی ضابطوں کے مطابق مکمل کی گئی۔
پولیس کے مطابق تلاشی مہم کے دوران ممنوعہ تنظیم سے متعلق لٹریچر سمیت قابلِ اعتراض مواد ضبط کیا گیا اور مزید جانچ اور معائنے کے لیے تحویل میں لے لیا گیا۔
انہوں نے بتایا کہ اس معاملے میں مزید تحقیقات جاری ہیں۔ پولیس نے کہا کہ یہ کارروائی سوپور پولیس کی اُن مسلسل کوششوں کا حصہ ہے جن کا مقصد ممنوعہ تنظیموں اور ملک مخالف نیٹ ورکس سے وابستہ سرگرمیوں میں ملوث افراد کی شناخت کر کے ان کے خلاف قانونی کارروائی کرنا ہے۔
