سری نگر، 6 اپریل: محکمہ موسمیات نے جموں و کشمیر میں ایک اور بارش والے دور کی پیش گوئی کی ہے، جس کے تحت منگل کی صبح سے بدھ کی شام تک وقفے وقفے سے ہلکی سے معتدل بارش متوقع ہے۔ اس دوران بلند پہاڑی علاقوں میں برفباری کا امکان بھی ہے۔
پیش گوئی کے مطابق جموں اور کشمیر دونوں صوبوں کے کچھ مقامات پر معتدل سے شدید بارش ہو سکتی ہے، جبکہ بلند پہاڑی علاقوں میں ہلکی سے معتدل برفباری متوقع ہے۔
محکمہ موسمیات نے 7 اور 8 اپریل کو چند مقامات پر گرج چمک، ژالہ بھاری، اور 40–50 کلومیٹر فی گھنٹہ کی رفتار سے تیز ہواؤں کے امکان کی وارننگ بھی جاری کی ہے۔ اس کے علاوہ کہا گیا ہے کہ مختصر مدت کے شدید بارش کے دوران ممکنہ طور پر فلڈ، لینڈ سلائیڈنگ اور نچلے علاقوں میں پانی جمع ہونے کے خطرات ہیں۔
محکمہ موسمیات کے مطابق 9 اور 10 اپریل کو بلند پہاڑی علاقوں میں مختصر وقفے سے ہلکی بارش اور برفباری کے امکانات ہیں۔
11 سے 16 اپریل کے درمیان موسم عمومی طور پر خشک رہنے کی توقع ہے، حالانکہ دوپہر کے وقت چند مقامات پر مختصر بارش کے امکانات سے انکار نہیں کیا جا سکتا۔
دریں اثنا، یونین ٹریٹری میں رات کے کم سے کم درجہ حرارت میں مختلف رجحانات دیکھے گئے، جہاں کشمیر صوبے کے کئی علاقوں میں درجہ حرارت معمول سے 1سے3 ڈگری سیلیس زیادہ ریکارڈ کیا گیا، جبکہ جموں صوبے کے کئی مقامات پر درجہ حرارت معمول سے صفر سے تین ڈگری سیلسیس کم رہا۔
محکمہ موسمیات کے ڈیٹا کے مطابق کشمیر صوبے میں سب سے کم درجہ حرارت گلمرگ میں ریکارڈ کیا گیا، جہاں درجہ حرارت منفی ایک اشارہ ایک ڈگری سیلسیس تک پہنچ گیا۔ جموں صوبے میں سب سے سرد مقام بھدرواہ رہا، جہاں کم سے کم درجہ حرارت صفر اشارہ چار ڈگری سیلسیس ریکارڈ کیا گیا۔(یو این آئی)
