جموں،:جموں و کشمیر کے وزیر اعلیٰ عمر عبداللہ نے منگل کے روز کہا ہے کہ حکومت رواں سال 25 ہزار خالی آسامیوں کو پُر کرنے کے لیے پُرعزم ہے۔
قانون ساز اسمبلی میں اظہارِ خیال کرتے ہوئے وزیر اعلیٰ نے کہا کہ حکومت اس سال کے دوران 25 ہزار آسامیوں کو پُر کرنے کے اپنے عزم پر قائم ہے۔
انہوں نے کہا کہ یہ معاملہ اس اجلاس کے دوران متعدد بار زیرِ بحث آ چکا ہے، جن میں ایل جی کی تقریر، بجٹ اور گرانٹس پر ہونے والی گفتگو بھی شامل ہے۔ وہ یہ بات پلوامہ سے رکن اسمبلی وحید الرحمان پرہ کے سوالات کا جواب دیتے ہوئے کہہ رہے تھے۔
وزیر اعلیٰ نے کہا کہ حکومت اس بات کو یقینی بنانے کی خواہاں ہے کہ بھرتی کا عمل شفاف اور مقررہ وقت کے اندر مکمل ہو۔
انہوں نے واضح کیا کہ مقررہ وقت کا مطلب ہرگز یہ نہیں کہ عمل کو عجلت میں مکمل کیا جائے، جس کے نتیجے میں معاملہ عدالتوں تک پہنچ جائے اور عمل تعطل کا شکار ہو جائے۔
انہوں نے مزید کہا کہ ماضی میں کئی مرتبہ سلیکشن فہرستیں تیار کی گئیں لیکن بعد ازاں انہیں عدالتوں میں چیلنج کیا گیا، جس کے باعث معاملات کے حل میں طویل وقت لگا اور کئی امیدوار عمر کی حد سے تجاوز کر گئے اور بھرتی سے محروم رہے۔ انہوں نے کہا کہ حکومت اس حوالے سے توازن برقرار رکھنا چاہتی ہے۔(کے این او)
