جموں،: جموں و کشمیر قانون ساز اسمبلی کے سپیکر عبدالرحیم راتھر نے منگل کے روز کہا کہ سیکورٹی کا منظرنامہ آسانی سے نہیں لیا جا سکتا اور ماضی کے واقعات موجودہ فیصلوں کے لیے رہنمائی فراہم کرتے ہیں۔
نیشنل کانفرنس کے ہیڈکوارٹرز اور متعدد قانون سازوں کی سیکورٹی کور کے انخلا پر بحث کے دوران سپیکر نے کہا کہ جو لوگ ایسے حالات کا تجربہ رکھتے ہیں وہ خطرات کو بہتر سمجھتے ہیں۔
انہوں نے کہا کہ بہتری کے دعووں کے باوجود صورتحال ابھی بھی احتیاط کا متقاضی ہے۔ انہوں نے کہا:’’ماضی کے سیکورٹی واقعات کو مدنظر رکھتے ہوئے ہمیں ہوشیار رہنا چاہیے۔ سیکورٹی کو سنجیدگی سے لینا ضروری ہے۔‘‘
سپیکر نے مزید کہا کہ اگر انتظامیہ یہ سمجھتی ہے کہ صورتحال مکمل طور پر معمول پر آ چکی ہے تو اسے واضح طور پر جموں و کشمیر کو خطرے سے آزاد علاقہ قرار دینا چاہیے۔
انہوں نے امید ظاہر کی کہ قانون سازوں کی جانب سے اٹھائے گئے خدشات متعلقہ حکام کی طرف سے سنجیدگی سے لیے جائیں گے۔(کے این او)
