صوبائی کمشنر کشمیر، انشل گرگ کا بیان
سری نگر،: صوبائی کمشنر کشمیر انشل گرگ نے پیر کے روز کہا ہے کہ وادیٔ کشمیر میں ایندھن یا ایل پی جی کی کوئی قلت نہیں ہے اور آئندہ 10 سے 15 دن کے لیے وافر ذخیرہ دستیاب ہے۔ انہوں نے یقین دلایا کہ صورتحال پر مختلف سطحوں پر مسلسل نظر رکھی جا رہی ہے۔
میڈیا سے گفتگو کرتے ہوئے انہوں نے کہا کہ گھریلو ایل پی جی کی فراہمی معمول کے مطابق جاری ہے اور موجودہ ذخیرہ 10 سے 15 دن کے لیے کافی ہے۔ ان کا کہنا تھا کہ ذخائر کی صورتحال متحرک ہوتی ہے، تاہم اس وقت کسی قسم کی کمی نہیں اور ڈویژنل و ضلعی سطح پر مسلسل نگرانی کی جا رہی ہے تاکہ فراہمی میں کوئی خلل نہ آئے۔
انہوں نے مزید بتایا کہ پٹرول اور ڈیزل کی سپلائی بھی مستحکم ہے، جبکہ آئل مارکیٹنگ کمپنیوں کی ضلعی سطح پر قائم کمیٹیاں نگرانی کر رہی ہیں تاکہ ذخیرہ اندوزی، بلیک مارکیٹنگ یا زائد قیمتوں کی روک تھام کی جا سکے۔
ان کے مطابق ضلعی اور ڈویژنل سطح پر قائم کنٹرول رومز سپلائی اور تقسیم کے نظام کی مسلسل نگرانی کر رہے ہیں، جبکہ محکمہ خوراک و شہری رسد روزانہ کی بنیاد پر مرکزی طرز پر رپورٹس تیار کر رہا ہے، جن کا باقاعدگی سے جائزہ لیا جا رہا ہے تاکہ عوام کو کسی قسم کی دشواری کا سامنا نہ ہو۔
ایل پی جی کی ترسیل میں تاخیر سے متعلق شکایات پر انہوں نے کہا کہ ایسے معاملات کو کیس بہ کیس بنیاد پر ڈپٹی کمشنرز اور متعلقہ محکمے حل کر رہے ہیں، جبکہ فیلڈ میں تعینات ٹیمیں بروقت فراہمی کو یقینی بنانے کے لیے سرگرم عمل ہیں۔
صوبائی کمشنر نے عوام سے اپیل کی کہ وہ صرف سرکاری اطلاعات پر اعتماد کریں اور افواہوں سے گریز کریں۔ انہوں نے کہا کہ حکومت عوام کو بروقت معلومات فراہم کرنے اور بلا تعطل فراہمی یقینی بنانے کے لیے پُرعزم ہے۔
ایران میں پھنسے جموں و کشمیر کے طلبہ کے حوالے سے انہوں نے کہا کہ حکومت ہند اور یونین ٹیریٹری انتظامیہ ان کی محفوظ واپسی کے لیے مسلسل کوششیں کر رہی ہیں۔ اس ضمن میں خصوصی ہیلپ لائنز قائم کی گئی ہیں اور کنٹرول رومز کے ذریعے والدین سے مسلسل رابطہ رکھا جا رہا ہے۔
انہوں نے مزید کہا کہ حکومت ہند سے موصول ہونے والی ہر تازہ اطلاع اہل خانہ تک پہنچائی جا رہی ہے، جبکہ وزیر اعلیٰ نے بھی ہر ممکن تعاون کی یقین دہانی کرائی ہے۔
انہوں نے کہا کہ انتظامیہ اور والدین کے درمیان رابطہ بہتر ہوا ہے اور والدین بھرپور تعاون کر رہے ہیں۔ “ہماری کوشش ہے کہ تمام طلبہ بحفاظت اور جلد از جلد واپس لوٹ آئیں، اور ہمیں امید ہے کہ صورتحال جلد معمول پر آ جائے گی۔”
انہوں نے کہا کہ انتظامیہ صورتحال پر گہری نظر رکھے ہوئے ہے اور ضروری اقدامات کو ترجیحی بنیادوں پر یقینی بنایا جا رہا ہے۔ (کے این او)
