ایران سے گزرنے والی کئی ہندوستانی پروازیں منسوخ، دیگر کے روٹ میں تبدیلی

نئی دہلی،: ہندوستانی ایئر لائنز نے ایران کے اوپر سے گزرنے والی کئی پروازیں منسوخ کر دی ہیں اور بہت سی دوسری پروازوں کے روٹ تبدیل کردئے گئے ہیں۔
یہ فیصلہ ایران کی جانب سے تجارتی پروازوں کے لیے اپنی فضائی حدود بند کرنے کے بعد کیا گیا ہے۔
سوشل میڈیا پلیٹ فارم ایکس پر ایک پوسٹ میں، ٹاٹا گروپ کی ایئر انڈیا نے کہا کہ "ایران میں پیش رفت، اس کے بعد فضائی حدود کی بندش اور مسافروں کی حفاظت کے پیش نظر،” اس خطے میں پروازوں کا راستہ تبدیل کر دیا گیا ہے، جس کی وجہ سے پروازوں میں تاخیر ہو سکتی ہے۔ اس میں کہا گیا ہے کہ جن پروازوں کے راستے میں تبدیلی فی الحال ممکن نہیں ہے، انہیں منسوخ کردیاگیا ہے۔
اس نے مسافروں کو مشورہ دیا کہ وہ ہوائی اڈوں کے لیے روانہ ہونے سے پہلے فلائٹ کی حالت چیک کریں اور اس کی وجہ سے ہونے والی تکلیف پر افسوس کا اظہار کیا۔
ذرائع نے بتایا کہ ایئر انڈیا کی امریکہ جانے والی تین پروازیں منسوخ کر دی گئی ہیں۔ دیگر پروازوں کا رخ موڑ دیا گیا ہے۔
نجی ایئر لائن انڈیگو نے بھی "ایران کی فضائی حدود کی اچانک بندش” کا حوالہ دیتے ہوئے ایکس پر بتایا ہے کہ اس کی کچھ بین الاقوامی پروازیں متاثر ہوئی ہیں۔ اس نے صورتحال پر افسوس کا اظہار کیا اور کہا کہ یہ ایئر لائن کے کنٹرول سے باہر ہے۔
کفایتی ایئر لائن کمپنی اسپائس جیٹ نے بھی ایکس پر پوسٹ کیا کہ اس کی کچھ پروازیں متاثر ہو سکتی ہیں۔
قابل ذکر ہے کہ ایران نے ابتدائی طور پر تجارتی پروازوں کے لیے اپنی فضائی حدود دو گھنٹے کے لیے بند کرنے کا اعلان کیا تھا۔ بعد ازاں مدت میں توسیع کردی گئی۔