سری نگر: وادی کشمیر میں سخت سردیوں اور بھاری برف باری کے لئے مشہور چالیس روزہ چلہ کلاں کے اگلے دو ہفتے بھی لگ بھگ خشک رہنے کا ہی امکان ہے۔
محکمہ موسمیات کے ایک ترجمان کے مطابق وادی مین 23 جنوری تک موسم میں کسی بڑی تبدیلی کا کوئی امکان نہیں ہے۔
انہوں نے کہا کہ وادی میں 8 سے 15 جنوری تک موسم جزوی طور پر ابر آلود رہنے کی توقع ہے۔انہوں نے کہا کہ بعد میں 16 اور 17 جنوری کو موسم مجموعی طور پر ابر آلود رہنے کے ساتھ وادی میں کہیں کہیں ہلکی برف باری یا بارشوں کا امکان ہے۔
ان کا کہنا ہے کہ 18 اور 19 جنوری کو موسم جزوی سے مجموعی طور پر ابر آلود رہ سکتا ہے جبکہ 20 جنوری کو موسم مجموعی طور پر ابر آلود رہنے کے ساتھ پہاڑی علاقوں میں کہیں کہیں ہلکی برف باری کا امکان ہے۔
موصوف ترجمان نے بتایا کہ وادی میں 21 جنوری کو موسم جزوی ابر آلود مگر عام طور پر خشک رہنے کی توقع ہے۔
انہوں نے کہا کہ بعد میں22 اور 23 جنوری کو موسم جزوی سے مجموعی طور پر ابر آلود رہنے کے ساتھ پہاڑی علاقوں میں کہیں کہیں ہلکی برف باری ہونے کا امکان ہے۔محکمے نے اپنی ایڈوائزری میں کہا ہے کہ وادی میں 10 جنوری تک شبانہ درجہ حرارت میں مزید گراوٹ کا امکان ہے جبکہ اس کے بعد اس میں 1 سے 2 ڈگری سینٹی گریڈ کی بہتری متوقع ہے۔انہوں نے کہا کہ جموں صوبے کے میدانی علاقوں میں کہیں کہیں اگلے 5 دنوں کے دھند بر قرار رہ سکتی ہے۔
قابل ذکر ہے کہ وادی میں چالیس روزہ چلہ کلاں چل رہا ہے جو 21 دسمبر سے شروع ہوکر 31 جنوری کو اختتام پذیر ہوجاتا ہے۔
چلہ کلاں کا نصف حصہ مکل ہوچکا ہے جس میں گرچہ سردیوں نے سخت تیور دکھائے تاہم وسیع پیمانے پر برف باری نہیں ہوئی اور سری نگر سمیت وادی کے میدانی علاقے برف باری کا بے صبری سے انتظار کر رہے ہیں۔
