سری نگر: وادی کشمیر کے سیاحتی مقامات گلمرگ اور سونمرگ کے ساتھ ساتھ کچھ پہاڑی علاقوں میں تازہ برف باری کے بیچ محکمہ موسمیات نے اگلے 24 گھنٹوں کے دوران مزید برف وباراں کی پیش گوئی کی ہے۔
اطلاعات کے مطابق گلمرگ، گریز، مژھل اور شمالی کشمیر کے کئی علاقوں میں ہلکی سے درمیانی درجے کی برفباری ہوئی ہے۔
محکمہ موسمیات کے ایک ترجمان نے بتایا کہ وادی میں 31 دسمبر اور یکم جنوری کو موسم ابر آلود رہنے کے ساتھ کئی مقامات پر ہلکی سے درمیانی درجے کی برف باری کا امکان ہے جس کا زیادہ اثر 31 دسمبر کی شام سے یکم جنوری کی صبح یا دوپہر تک رہ سکتا ہے۔
انہوں نے کہا کہ اس دوران شمالی اور وسطی کشمیر کے کچھ پہاڑی علاقوں میں درمیانی سے بھاری برف باری کا امکان ہے۔
ان کا کہنا ہے کہ وادی میں 2 جنوری کو بھی موسم جزوی سے مجموعی طور پر ابر آلود رہنے کے ساتھ کہیں کہیں ہلکی بارف باری ہوسکتی ہے۔موصوف ترجمان نے بتایا کہ بعد میں 3 سے 5 جنوری تک موسم جزوی طور پر ابر آلود مگر مجموعی طور پر خشک رہنے کا امکان ہے۔
انہوں نے کہا کہ 6 جنوری کو موسم ایک بار پر عام طور پر خشک رہنے کے ساتھ شمالی اور وسطی کشمیر کے پہاڑی علاقوں میں کہیں کہیں ہلکی برف باری کی توقع ہے۔ان کا کہنا ہے کہ بعد ازاں وادی میں 7 سے 13 جنوری تک موسم کبھی جزوی تو کبھی مجموعی طور پر ابر آلود رہنے کا امکان ہے۔
محکمے نے اپنی ایڈوائزری میں مسافروں اور ٹرانسپورٹروں سے کہا ہے کہ وہ ٹریفک اور انتظامیہ کی طرف سے جاری مشوروں پر سختی سے عمل کریں۔انہوں نے کہ جموں صوبے کے کچھ علاقوں میں اگلے 48 گھنٹوں کے دوران درمیانی درجے سے گھنی دھند چھائی رہ سکتی ہے۔
ادھر مطلع ابر آلود رہنے سے وادی میں شبانہ درجہ حرارت میں نمایاں بہتری ریکارڈ ہونے سے ٹھٹھرتی سردیوں سے لوگوں کو کسی حد تک راحت نصیب ہوئی ہے۔
کشمیر ویدر کے مطابق گرمائی دارلحکومت سری نگر میں کم سے کم درجہ حرارت 2.3 ڈگری سینٹی گریڈ ریکارڈ ہوا ہے جہاں 28 نومبر کو رواں موسم کی سرد ترین رات ریکارڈ ہوئی تھی جب شبانہ درجہ حرارت منفی4.5 ڈگری سینٹی گریڈ ریکارڈ ہوا تھا۔وادی کے سیاحتی مقامات گلمرگ اور پہلگام میں کم سے کم درجہ حرارت بالترتیب منفی 3.0 ڈگری سینٹی گریڈ اور 1.8 ڈگری سینٹی گریڈ ریکارڈ ہوا ہے۔
سرحدی ضلع کپوارہ میں کم سے کم درجہ حرارت 1.6 ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 1.4 ڈگری سینٹی گریڈ ریکارڈ ہوا ہے۔
شمالی کشمیر کے بارہمولہ اور بانڈی پورہ اضلاع میں کم سے کم درجہ بالترتیب 2.8 ڈگری سینٹی گریڈ اور 2.6 ڈگری سینٹی گریڈ جبکہ وسطی کشمیر کے بڈگام اور گاندربل اضلاع میں شبنہ درجہ حرارت بالترتیب منفی1.2 ڈگری سینٹی گریڈ اور1.8 ڈگری سینٹی گریڈ ریکارڈ ہوا ہے۔
جنوبی کشمیر کے اننت ناگ، پلوامہ اور شوپیاں اضلاع میں کم سے کم درجہ حرارت بالترتیب 0.7 ڈگری سینٹی گریڈ، منفی0.2 ڈگری سینٹی گریڈ اور منفی1.1 ڈگری سینٹی گریڈ ریکارڈ ہوا ہے۔
لداخ یونین ٹریٹری کے ضلع لیہہ میں کم سے کم درجہ حرارت منفی6.0 ڈگری سینٹی گریڈ ریکارڈ ہوا ہے۔
