سری نگر: محکمہ موسمیات کی پیش گوئی کے مطابق وادی کشمیر میں سال نو کا استقبال برف و باراں سے ہونے کا امکان ہے۔
محکمے کے ایک ترجمان نے بتایا کہ وادی میں 26 سے 29 دسمبر تک موسم جزوی ابر آلود مگر مجموعی طور پر خشک رہنے کا امکان ہے۔
انہوں نے کہا کہ 30 دسمبر کو موسم عام طور پر ابر آلود رہنے کے ساتھ کہیں کہیں ہلکی بارش یا برف باری ہوسکتی ہے۔
ان کا کہنا ہے کہ بعد ازاں 31 دسمبر اور یکم جنوری کو وادی میں موسم عام طور پر ابر آلود رہ سکتا ہے اور کئی علاقوں میں ہلکی بارشیں یا برف باری کا امکان ہے جبکہ اس دوران شمالی اور وسطی کشمیر کے کچھ بالائی اور درمیانی علاقوں میں معتدل برف باری ہوسکتی ہے۔
موصوف ترجمان نے بتایا کہ 2 جنوری کو موسم جزوی طور پر ابر آلود رہ سکتا ہے اور اس دوران چند بالائی علاقوں میں ہلکی برف باری متوقع ہے۔
انہوں نے کہا کہ اس کے بعد 3 سے 6 جنوری تک موسم جزوی سے مجموعی طور پر ابر آلود رہ سکتا ہے۔
محکمے نے اپنی ایڈوائزری میں مسافروں اور ٹرانسپورٹروں کو ٹریفک اور انتظامیہ کی ایڈوائزرز پر سختی سے عمل کرنے کا مشورہ دیا۔
انہوں نے کہا جموں صوبے کے میدانی علاقوں میں آئندہ 3 دنوں کے دوران کہیں کہیں درمیانی درجے یا شدید دھند چھائی رہ سکتی ہے۔
دریں اثنا محکمے کے مطابق وادی کے بیشتر علاقوں میں شبانہ درجہ حرارت معمول سے 1.3 ڈگری سینٹی گریڈ زیادہ ریکارڈ ہوا ہے جس سے لوگوں کو ٹھٹھرتی شبانہ سردیوں سے قدرے راحت نصیب ہوئی ہے۔
گرمائی دارلحکومت سری نگر میں کم سے کم درجہ حرارت 0.2 ڈگری سینٹی گریڈ ریکارڈ ہوا ہے جہاں گذشتہ شب کا درجہ حرارت منفی2.2 ڈگری سینٹی گریڈ ریکارڈ ہوا تھا۔
سری نگر میں 28 نومبر کو رواں موسم کی سرد ترین ریکارڈ ہوئی تھی جب شبانہ درجہ حرارت منفی4.5 ڈگری سینٹی گریڈ ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت منفی4.5 ڈگری سینٹی گریڈ جبکہ وادی کے دوسرے مشہور سیاحتی مقام پہلگام میں کم سے کم درجہ حرارت منفی1.6 ڈگری سینٹی گریڈ ریکارڈ ہوا ہے۔
سرحدی ضلع کپوارہ میں کم سے کم درجہ حرارت منفی2.4 ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں شبانہ درجہ حرارت0.2 ڈگری سینٹی گریڈ ریکارڈ ہوا ہے۔
شمالی کشمیر کے بارہمولہ اور بانڈی پورہ اضلاع میں شبانہ درجہ حرارت بالترتیب منفی0.7 ڈگری سینٹی گریڈ اور 0.2 ڈگری سینٹی گریڈ جبکہ وسطی کشمیر کے بڈگام اور گاندربل اضلاع میں کم سے کم درجہ حرارت بالترتیب منفی0.4 ڈگری سینٹی گریڈ اور منفی0.1 ڈگری سینٹی گریڈ ریکارڈ ہوا ہے۔
جنوبی کشمیر کے اننت ناگ، پلوامہ، شوپیاں اور کولگام اضلاع میں کم سے کم درجہ حرارت بالترتیب منفی0.3 ڈگری سینٹی گریڈ، منفی3.4 ڈگری سینٹی گریڈ، منفی2.5 ڈگری سینٹی گریڈ اور 0.9 ڈگری سینٹی گریڈ ریکارڈ ہوا ہے۔
وادی کے ایک اور سیاحتی مقام سونہ مرگ میں کم سے کم درجہ حرارت منفی4.7 ڈگری سینٹی گریڈ ریکارڈ ہوا ہے۔
لداخ یونین ٹریٹری کے لیہہ اور کرگل اضلاع میں شبانہ درجہ حرارت بالترتیب منفی9.8 ڈگری سینٹی گریڈ اور منفی9.3 ڈگری سینٹی گریڈ ریکارڈ ہوا ہے۔
قابل ذکر ہے کہ وادی میں سخت سردیوں کے لئے مشہور چالیس روزہ چلہ کلاں بر سر اقتدار ہے جس کا دور 21 دسمبر سے شروع ہوکر 31 جنوری کو اختتام پذیر ہوتا ہے۔
