بہار میں پہلے مرحلے کی 121 اسمبلی سیٹوں کے لیے ووٹنگ شروع

پہلے مرحلے کے پہلے دو گھنٹے میں 13.13 فیصد ووٹ ڈالے گئے

 بہار میں پہلے مرحلے کی پولنگ میں پہلے دو گھنٹے میں صبح 9 بجے تک 13.13 فیصد ووٹ ڈالے گئے ہیں۔
ریاستی الیکشن آفس کے مطابق پہلے مرحلے میں جمعرات کی صبح 7 بجے سے 18 اضلاع کے 121 اسمبلی حلقوں میں ووٹنگ شروع ہوئی۔ پہلے دو گھنٹے یعنی صبح 9 بجے تک 13.13 فیصد ووٹروں نے اپنے حق رائے دہی کا استعمال کیا۔ اس دوران سہرسہ ضلع میں سب سے زیادہ 15.27 فیصد ووٹنگ ریکارڈ کی گئی، جبکہ پٹنہ ضلع میں سب سے کم 11.22 فیصد ووٹنگ ہوئی۔
مدھے پورہ ضلع میں 13.74 فیصد، ضلع دربھنگہ میں 12.48 فیصد، ضلع مظفر پور میں 14.38، ضلع گوپال گنج میں 13.97، ضلع سیوان میں 13.35، سارن ضلع میں 13.30، ویشالی میں 14.30، ضلع سمستی پور میں 12.86، بیگوسرائے میں 14.60، کھگڑیا میں14.15، مونگیر 13.37، لکھیسرائے میں 13.39، شیخ پورہ میں 12.97، نالندہ میں 12.45، بھوجپور ضلع میں 13.11 فیصد اور ضلع بکسر میں 13.28 فیصد ووٹروں نے اپنے حق رائے دہی کا استعمال کیا۔
مرکزی وزیر گریراج سنگھ نے لکھیسرائے کے بڑہیا کےمڈل اسکول، بڑہیا نمبر 2 میں واقع پولنگ اسٹیشن نمبر 43 کے مشرقی حصے پر پہنچ کر اپنا ووٹ ڈالا۔ ووٹنگ صبح 7 بجے شروع ہوئی اور گریراج سنگھ وقت سے پہلے پہنچ کر قطار میں کھڑے ہوکر ووٹ ڈالنے والے پہلے ووٹر بنے۔ ان کی ووٹنگ کے ساتھ ہی اسٹیشن پر ووٹنگ کے عمل کا آغاز ہوا۔
تارا پور میں بہار کے نائب وزیر اعلیٰ اور اسی سیٹ سے بھارتیہ جنتا پارٹی (بی جے پی) کے امیدوار سمراٹ چودھری نے اپنا ووٹ ڈالا۔ انہوں نے کہا، "آپ سب کو بڑی تعداد میں ووٹ دینا چاہیے اور ایک مضبوط، محفوظ، خوشحال اور ترقی یافتہ بہار کے لیے ووٹ کریں۔”
لکھی سرائے میں بہار کے نائب وزیر اعلیٰ اور اس سیٹ سے بی جے پی کے امیدوار وجے کمار سنہا نے پہلے مرحلے میں اپنا ووٹ ڈالا۔ پولنگ اسٹیشن پہنچ کر لائن میں کھڑے ہو کر ووٹنگ کے عمل میں حصہ لیا۔ اپنا ووٹ ڈالنے کے بعد مسٹر سنہا نے کہا کہ جمہوریت کو مضبوط کرنے کے لیے ہر ووٹر کو ووٹ دینا چاہیے اور جوش و خروش سے حصہ لینا چاہیے۔ بہار حکومت کے سڑک کی تعمیر کے وزیر اور بانکی پور اسمبلی سیٹ سے بی جے پی کے امیدوار نتن نوین نے ملر ہائی اسکول میں اپنا ووٹ ڈالا۔
راشٹریہ جنتا دل (آر جے ڈی) کے قومی صدر لالو پرساد یادو اور ان کی اہلیہ سابق وزیر اعلیٰ رابڑی دیوی نے پٹنہ کے ایک پولنگ اسٹیشن پر اپنا ووٹ ڈالا۔ آر جے ڈی لیڈر اور عظیم اتحاد کے وزیر اعلیٰ کے امیدوار تیجسوی یادو نے بھی اپنی اہلیہ کے ساتھ ووٹ ڈالا۔ تیجسوی یادو نے کہا کہ ہم صرف یہ کہیں گے کہ تبدیلی ضروری ہے، نیا بہار بنائیں، نئی حکومت بنائیں۔ دریں اثنا، رابڑی دیوی نے کہا، "میں تمام ووٹروں سے ووٹ دینے کی اپیل کرتی ہوں… دونوں بیٹوں کو ان کی ماں کی طرف سے نیک تمنائیں اور دونوں کے لیے آشیرواد۔ میں خواتین، بچوں اور ہر ایک سے اپیل کرتی ہوں کہ وہ گھروں سے نکل کرووٹ دیں… اس بار تبدیلی آئے گی؛ عوام تبدیلی لائیں گے۔”
مرکزی وزیر راجیو رنجن سنگھ عرف للن سنگھ نے کہا، "یہ جمہوریت کا عظیم تہوار ہے اور ہم سب کو ووٹ دینا چاہیے۔ پہلے ووٹ، پھر ریفریشمنٹ۔ انہوں نے کہا کہ کہیں بھی کوئی مسئلہ نہیں ہے۔ نتیش کمار کی قیادت میں بہار میں ایک مضبوط حکومت بنے گی…”
مرکزی وزیر اور لوک جن شکتی پارٹی (رام ولاس) کے قومی صدر چراغ پاسوان نے 2025 کے بہار اسمبلی انتخابات کے پہلے مرحلے پر بات کرتے ہوئے کہا، "میں تمام ووٹروں سے ووٹ دینے کی اپیل کرتا ہوں۔ میں چاہتا ہوں کہ آج ووٹنگ کا ریکارڈ بنے اور سب سے زیادہ ووٹنگ ہو… سب کو آج متحد ہو کر ووٹ دینا چاہیے۔”
مرکزی وزیر نتیا نند رائے نے کہا، "بہار جمہوریت کی ماں ہے۔ بہار کی ویشالی نے جمہوریت کو جنم دیا ہے۔ آج ہم سب کو ووٹ دینے اور جمہوریت کا عظیم تہوار منانے کی اپیل کرتے ہیں۔ قومی جمہوری اتحاد (این ڈی اے) کی جیت ہوگی۔”