ممبئی،: بالی ووڈ اداکارہ شیفالی زری والا کا انتقال ہوگیاہے۔ وہ 42 برسکی تھیں۔بتایا جا رہا ہے کہ 27 جون کی رات شیفالی کو اچانک سینے میں شدید درد محسوس ہوا۔ اس کے شوہر پیراگ تیاگی انہیںفوری طور پر ممبئی کے ایک اسپتال لے گئے جہاں ڈاکٹروں نے انہیں مردہ قرار دے دیا۔
شیفالی زری والا سال 1982 میں گجرات میں پیدا ہوئیں۔ شیفالی شروع سے ہی فلمی دنیا کا حصہ بننا چاہتی تھیں، اس لیے موقع ملتے ہی وہ اپنے خوابوں کو پورا کرنے کے لیے گجرات سے ممبئی آگئیں۔ یہاں آکر انہوں نے کئی میوزک البمز اور فلموں میں بھی کام کیا۔ شیفالی نے سال 2005 میں سردار پٹیل کالج آف انجینئرنگ سے انفارمیشن ٹیکنالوجی میں ماسٹر کی ڈگری حاصل کی۔ انجینئرنگ کی تعلیم کے دوران انہیں ایک میوزک البم میں کام کرنے کا موقع ملا۔
شیفالی کو 2002 میں ریلیز ہونے والے ریمکس گانے ‘کانٹا لگا’ کے میوزک ویڈیو سے راتوں رات شہرت ملی۔ اس گانے نے انہیں ‘کانٹا لگا گرل’ کا خطاب دیا اور یہ گانا اس وقت سب کے لبوں پر تھا۔ ان کے بولڈ انداز نے شائقین کے دل جیت لیے۔ اس گانے کی کامیابی کے بعد شیفالی نے کئی دیگر میوزک ویڈیوز، رئیلٹی شوز اور فلموں میں بھی کام کیا۔
شیفالی نے 2004 میں ریلیز ہونے والی سلمان خان اور اکشے کمار کی فلم ‘مجھ سے شادی کروگی’ میں بھی ایک چھوٹا لیکن اہم کردار ادا کیا تھا۔ اس دوران سال 2004 میں انہوں نے میٹ برادرز کے میوزک ڈائریکٹر ہرمیت سنگھ سے شادی کی۔ یہ شادی بھی بہت مشہور ہوئی۔ لیکن یہ رشتہ زیادہ دیر تک نہ چل سکا اور 2009 میں دونوں الگ ہو گئے۔اس کے بعد سال 2014 میں انہوں نے اداکار پیراگ تیاگی سے شادی کی۔
شیفالی نے اپنے شوہر اداکار پراگ تیاگی کے ساتھ ‘نچ بلیے 5’ اور ‘نچ بلیے 7’ میں حصہ لیا۔ سال 2019 میں، شیفالی ‘بگ باس 13’ میں ایک مدمقابل کے طور پر نظر آئیں۔ شیفالی کے اچانک انتقال کی خبر نے انٹرٹینمنٹ انڈسٹری اور ان کے مداحوں کو صدمہ پہنچایا ہے۔ سوشل میڈیا پر لوگ تعزیت کا اظہار کر رہے ہیں۔
یو این آئی
