سرینگر، : منشیات کے کاروبار کے خلاف ایک بڑی کارروائی کے تحت سرینگر پولیس نے جمعہ کو نارکوٹک ڈرگس اینڈ سائیکو ٹراپک سبسٹینسز (NDPS) ایکٹ کے تحت بدنام زمانہ منشیات فروش کی تقریباً 50 لاکھ روپے مالیت کی جائیداد ضبط کر لی۔
یہ کارروائی بلال احمد وانی ولد غلام احمد وانی ساکن سرگفورہ، اننت ناگ کے خلاف کی گئی، جو پولیس اسٹیشن شہید گنج میں درج این ڈی پی ایس کیس میں ملوث ہے۔
پولیس ترجمان کی جانب سے جاری بیان کے مطابق:
"سرینگر پولیس نے ایک بدنام زمانہ منشیات فروش بلال احمد وانی کی ملکیت رہائشی جائیداد، جس میں دو منزلہ مکان اور زمین شامل ہے، ضبط کر لی ہے۔ یہ جائیداد NDPS ایکٹ کے تحت کارروائی کے دوران ضبط کی گئی، اور اس کی مالیت تقریباً 50 لاکھ روپے ہے۔”
بیان میں مزید کہا گیا ہے کہ ملزم کے خلاف ایف آئی آر نمبر 05/2025 درج ہے، جس میں NDPS ایکٹ کی دفعات 8/20 اور 29 شامل ہیں، اور یہ کیس پولیس اسٹیشن شہید گنج میں زیر تفتیش ہے۔
بیان میں واضح کیا گیا کہ مذکورہ جائیداد غیر قانونی منشیات کی اسمگلنگ سے حاصل شدہ آمدنی سے خریدی گئی ہے۔ NDPS ایکٹ کی دفعات 68-E اور 68-F کے تحت یہ غیر منقولہ جائیداد قانونی طریقہ کار کے مطابق ضبط کی گئی ہے۔
بیان کے مطابق: "اب یہ جائیداد کسی بھی صورت میں فروخت، منتقل یا استعمال نہیں کی جا سکتی جب تک کہ مجاز اتھارٹی سے پیشگی اجازت نہ لی جائے۔”
پولیس کے مطابق، ملزم کا منشیات فروشی کا مجرمانہ ریکارڈ ہے اور وہ خاص طور پر نوجوانوں کو نشانہ بنا کر منشیات کی ترسیل میں سرگرم تھا، جو کہ عوامی صحت اور سلامتی کے لیے ایک سنگین خطرہ ہے۔
یہ کارروائی جموں و کشمیر پولیس کی جانب سے منشیات کے نیٹ ورکس کے خلاف جاری سخت مہم کا حصہ ہے۔ پولیس کا کہنا ہے کہ وہ ان نیٹ ورکس کی مالی بنیادوں کو ختم کر کے منشیات کی روک تھام اور سماج کی حفاظت کے لیے پرعزم ہے۔
سرینگر پولیس نے منشیات کے خلاف اپنی پختہ وابستگی کا اعادہ کیا ہے اور عوام سے مسلسل تعاون کی اپیل کی ہے۔ پولیس نے کہا ہے کہ جو شہری منشیات سے متعلق کسی بھی سرگرمی کی اطلاع رکھتے ہیں، وہ براہِ راست ہیلپ لائن نمبر 9596770550 پر رابطہ کریں۔
بیان کے اختتام پر کہا گیا:”آئیے مل کر ایک منشیات سے پاک، محفوظ اور صحت مند سرینگر کی طرف قدم بڑھائیں۔”
