حکومت کی پالیسیوں اور فیصلوں کی وجہ سے ملک میں روزگار اور خود روزگار کے نئے مواقع پیدا ہو رہے ہیں: مودی

نئی دہلی: وزیر اعظم نریندر مودی نے پیر کو کہا کہ ان کی حکومت کی پالیسیاں اور فیصلے ملک میں روزگار اور خود روزگار کے نئے مواقع پیدا کر رہے ہیں اور ہندوستان کے نوجوان نئے اعتماد سے بھرے ہوئے ہیں۔

مودی نے روزگار میلے کے موقع پر ویڈیو کانفرنس کے ذریعے 71,000 سے زیادہ نو تعینات نوجوانوں کو تقرری لیٹر تقسیم کئے۔

نو تعینات اہلکاروں سے خطاب کرتے ہوئے انہوں نے کہا- “آج ہندوستان کے نوجوان نئے اعتماد سے بھرے ہوئے ہیں۔وہ ہر شعبے میں اپنا جھنڈا لہرا ر ہے ہیں۔‘‘

نئی تعلیمی پالیسی کا تذکرہ کرتے ہوئے انہوں نے کہا کہ ملک کئی دہائیوں سے نئے ہندوستان کی تعمیر کے لیے جدید تعلیمی نظام کی ضرورت محسوس کر رہا تھا۔ انہوں نے کہا، “ملک اب قومی تعلیمی پالیسی کے ذریعے اس سمت میں آگے بڑھ گیا ہے۔ آج ہماری حکومت کی پالیسیوں اور فیصلوں کی وجہ سے دیہی ہندوستان میں بھی روزگار اور خود روزگار کے نئے مواقع پیدا ہو رہے ہیں۔

انہوں نے کہا کہ زراعت کے شعبے میں نوجوانوں کی بڑی تعداد کو روزگار ملا ہے، انہیں اپنی پسند کا کام کرنے کا موقع ملا ہے۔ خواتین کو بااختیار بنانے کو اپنی حکومت کی ترجیح قرار دیتے ہوئے، انہوں نے کہا، ’’ہماری کوشش ہے کہ خواتین کو ہر شعبے میں خود انحصار بنایا جائے۔‘‘

ملک بھر میں 45 مقامات پر روزگار میلے کا انعقاد کیا جا رہا ہے۔ نئے تعینات ہونے والے اہلکاروں کو مرکزی حکومت کی مختلف وزارتوں اور محکموں میں تعینات کیا جائے گا۔