جموں: جموں وکشمیر کے لیفٹیننٹ گورنر منوج سنہا کا کہنا ہے کہ ماتا ویشنو دیوی گنڈولہ پروجیکٹ کے خلاف احتجاج کرنے والے لوگوں کے تحفظات کا خیال رکھا جائے گا۔انہوں نے کہاکہ اتفاق رائے قائم کرنے کی خاطر صوبائی کمشنر جموں نے تمام فریقین کے ساتھ بات چیت کی ہے۔
ان باتوں کا اظہار ایل جی نے جموں میں نامہ نگاروں سے بات چیت کے دوران کیا۔کٹرا میں میں روپ وے کے خلاف جاری احتجاج کے بارے میں پوچھے گئے سوال کے جواب میں ایل جی منوج سنہا نے کہاکہ اس حوالے سے تمام فریقین کو اعتماد میں لیا جائے گا۔
انہوں نے کہاکہ شری ماتا ویشنو دیوی شرائن بورڈ لوگوں کے تحفظات کا ہر صورت میں خیال رکھے گا ۔لیفٹیننٹ گورنر منوج سنہا نے کہاکہ ماتا ویشنو دیوی روپ وے پروجیکٹ کی تعمیر کے دوران ہر کسی کے روزگار کا خیال رکھا جائے گا۔
انہوں نے مزید بتایا کہ اس حوالے سے سرکار نے پہلی ہی ایک کمیٹی تشکیل دی ہے تاکہ وہ تمام فریقین کے ساتھ بات چیت کرئے۔جموں میں سیاحتی شعبے کو مزید فروغ دینے کا ارادہ ظاہر کرتے ہوئے لیفٹیننٹ گورنر نے کہاکہ اس حوالے سے زمینی سطح پر اقدامات اٹھائے جارہے ہیں۔
انہوں نے کہاکہ جموں صوبے میں مختلف پروجیکٹوں پر کام اس وقت سرعت کے ساتھ جاری ہے اور مرکزی سرکار بھی بھر پور مالی معاونت فراہم کررہی ہے۔منوج سنہا نے کہاکہ جموں میں جتنے بھی مندر اور سیاحتی مقامات ہیں وہاں پر امسال مقامی اور غیر مقامی سیاحوں کی تعداد میں اضافہ دیکھنے کو ملا ہے۔
واضح رہے کہ روپ وے پروجیکٹ کے خلاف کٹرا میں گزشتہ چار دنوں سے احتجاج جاری ہے۔ پیر کے روز مظاہرین نے پولیس پر پتھراو بھی کیا جس کے نتیجے میں ایک اہلکار کو چوٹ آئی جبکہ گاڑی کے شیشے بھی چکنا چور ہوئے۔
