جموں انکائونٹر: سندر بنی سیکٹر میں تلاشی آپریشن جاری

جموں: جموں میں اکھنور کے سندر بنی سیکٹر میں چھپے ملی ٹنٹوں کی تلاش کے لئے منگل کو دوسرے روز بھی وسیع پیمانے پر آپریشن جاری ہے۔

بتادیں کہ اکھنور کے سندر بنی سیکٹر میں بٹل کری جوگون علاقے میں لائن آف کنٹرول (ایل او سی) کے نزدیک پیر کی صبح ملی ٹنٹوں نے ایک فوجی ایمبولینس پر فائرنگ کی جس کے بعد سیکورٹی فورسز نے علاقے کو محاصرے میں لے کر تلاشی آپریشن شروع کر دیا تھا۔

ذرائع نے بتایا کہ سیکورٹی فورسز نے منگل کی صبح علاقے میں تلاشی آپریشن دوبارہ شروع کر دیا۔

انہوں نے کہا کہ سیکورٹی فورسز پہلی دفعہ آپریشن کے دوران جدید ترین ٹینک کا استعمال کر رہے ہیں۔

فوج کی وائٹ نائٹ کور نے پیر کو ’ایکس‘ پر اپنے ایک پوسٹ میں کہا: ’جموں کے اکھنور میں سیکورٹی فورسز کے ساتھ تصادم میں ایک عدم شناخت دہشت گرد مارا گیا اور اس کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کرکے ضبط کیا گیا۔‘

فوج کے مطابق اس انکائونٹر کے دوران فوج کا کتا ’پھن ٹام‘ مارا گیا۔

وائٹ نائٹ کور نے گذشتہ شام ’ایکس‘ پر ایک پوسٹ میں کہا: ’ہم اپنے حقیقی ہیرو ’انڈین آرمی کتا پھن ٹام‘ کی عظیم قربانی کو سلام پیش کرتے ہیں‘۔

انہوں نے کہا: ’جب ہمارے دستے پھنسے ہوئے دہشت گردوں کو گھیرے میں لے رہے تھے تو ’پھن ٹام‘دشمن کی گولی سے شدید زخمی ہوا، ان کی ہمت اور لگن کو کبھی فراموش نہیں کیا جائے گا۔ جاری آپریشن میں اب تک ایک دہشت گرد کو بے اثر کر دیا گیا ہے اور جنگی سامان کا سٹور برآمد کر لیا گیا ہے‘۔

یو این آئی