لہیہ:مرکزی زیر انتظام علاقے لداخ کے دربک میں گاڑی لڑھک گئی جس کے نتیجے میں چھ افراد ہلاک جبکہ 22دیگر شدید طورپر زخمی ہوئےہیں۔
معلوم ہوا ہے کہ زخمیوں میں متعدد افراد کی حالت نازک بنی ہوئی ہے۔اطلاعات کے مطابق لہیہ کے دربک علاقے میں جمعرات کے روز مسافروں سے کھچا کھچ بھری ہوئی ایک گاڑی ڈرائیور کے قابو سے باہر ہو کر چار سو فٹ گہری کھائی میں جاگری جس کے نتیجے میں گاڑی میں سوار 30کے قریب افراد شدید طورپر زخمی ہوئے۔
حادثے کی اطلاع ملتے ہی پولیس ، فوج اور مقامی لوگ جائے موقع پر پہنچے اور ریسکیو آپریشن شروع کیا جس دوران زخمیوں کو علاج ومعالجہ کی خاطر نزدیکی ہسپتال منتقل کیا گیا تاہم وہاں پر تعینات ڈاکٹروں نے 6افراد کو مردہ قرار دیا۔
سرکاری ذرائع نے بتایا کہ زخمیوں میں سے متعدد افراد کی حالت نازک بنی ہوئی ہے جنہیں ایس این ایم ہسپتال لہیہ منتقل کیا گیا ہے۔
دریں اثنا پولیس نے حادثے کی وجوہات جاننے کی خاطر کیس درج کرکے مزید تحقیقات شروع کی ۔
یو این آئی
