راہل گاندھی اور ملکا ارجن کھڑکے سری نگر وارد،کئی اہم سیاسی شخصیات کیساتھ رات دیر گئے ملاقاتیں
نیوزڈیسک
سری نگرکانگریس کے سینئر لیڈر راہل گاندھی اور پارٹی صدرملکا ارجن کھڑکے بدھ کی شام کوسری نگر پہنچے ، ہوائی اڈے پر کارکنوں کی ایک بڑی تعداد نے لیڈران کااستقبال کیا۔کانگریس صدر ملکا ارجن کھڑکے اور راہل گاندھی جوں ہی سری نگر ہوائی اڈے پر پہنچے تو وہاں پر کارکنوں نے ان کا پرتپاک استقبال کیا۔ذرائع نے بتایا کہ راہل گاندھی اورملکا ارجن کھڑکے ہوٹل گرینڈ للت میں قیام کریں گے جہاں پر ان سے ملنے کے لئے کارکنوں کی ایک بڑی تعداد پہلے سے ہی موجود ہیں۔باوثوق ذرائع کے مطابق راہل گاندھی سے نیشنل کانفرنس کے سرپرست اعلیٰ ڈاکٹر فاروق عبداللہ اور نائب صدر عمر عبداللہ ملاقی ہونگے جس دوران سیٹ شیئرنگ کے مسئلے پر بات چیت ہوگی۔انہوں نے کہاکہ پی ڈی پی کے سینئر لیڈران بھی راہل گاندھی کے ساتھ ملاقات کرسکتے ہیں۔دریں اثنا ذرائع کا کہنا ہے کہ کانگریس سے ناراض زائد از ایک درجن لیڈران کی دوبارہ پارٹی میں شمولیت کا امکان ہے۔معلوم ہوا ہے کہ مذکورہ لیڈران راہل گاندھی کی موجودگی میں کانگریس میں دوبارہ شمولیت اختیار کریں گے۔ذرائع کے مطابق راہل گاندھی کا سری نگر دورہ غیر معمولی اہمیت کاحامل ہے کیونکہ اس دوران متحدہ طور پر اسمبلی الیکشن لڑنے پر پیش رفتہ ممکن ہے۔اس دوران راہل گاندھی نے پی ڈی پی صدر محبوبہ مفتی سے ملاقات کی ۔دونوں لیڈران نے بغل گیر ہوکر ایکدوسرے کا استقبال کیا ۔ذرائع نے بتایا کہ راہل گاندھی اور ملکا ارجن کھڑکے نے لالچوک میں واقع ایک نجی ہوٹل میں رات کا کھانا نوش کیا ۔معلوم ہوا ہے کہ کانگریس دونوں اہم ترین لیڈران نے نیشنل کانفرنس کے صدر ڈاکٹر فاروق عبداللہ اور نائب وزیر اعلیٰ عمر عبداللہ کیساتھ بھی بات چیت کی ۔اس دوران ایک میڈیا رپورٹ کے مطابق پی ڈی پی نے کہا کہ کانگریس کیساتھ انتخابی گٹھ جوڑ کرنے کے لئے دروازے کھلے ہیں ۔پارٹی کے سینئر لیڈر نعیم اختر نے کہا ہے کہ راہل گاندھی ایک بااثر آواز ہیں اور ان کے ساتھ ہاتھ ملانے میں کوئی قباحت نہیں ہے ۔ان کا کہناتھا کہ کشمیر مسئلے سمیت دیگر مسائل کے حل کے لئے پی ڈی پی ایک وسیع اتحاد کیساتھ آگے بڑھنا چاہتی ہے ۔راہل گاندھی اورپارٹی صدرملکا ارجن کھڑکے کا دورہ کشمیر انتہائی اہمیت کا حامل تصور کیا جارہا ہے ۔ادھر ایک میڈیا رپورٹ کے مطابق دونوں رہنما کل سری نگر اور جموں میں پارٹی کارکنوں سے خطاب کریں گے۔مسٹر گاندھی صبح10 بجے سری نگر میں پارٹی کارکنوں کی میٹنگ کریں گے اور پھر11:30 بجے پریس کو اپنے دورے کے بارے میں ایک بیان جاری کریں گے۔ دوپہر 2:15 بجے وہ جموں میں کارکنوں کے اجلاس سے خطاب کریں گے۔
