سری نگر: حضرت اما م حسین علیہ السلام کی کربلا میں یزیدی فوج کے ہاتھوں شہادت کے دن آج یوم عاشور پر جموں وکشمیر میں سینکڑوں جگہوں پر چھوٹے بڑے ماتمی جلوس نکالے گئے جن میں ہزاروں کی تعداد میں عزاداروں نے شرکت کی وادی کشمیر میں سب سے بڑا ماتمی جلوس زڈی بل اور بڈگام میں برآمد ہوئے اس موقع پر علمائے کرائم و ذاکرین نے اپنی تقاریر میں حضرت امام حسین علیہ السلام کی عظیم اور روشن تعلیمات اور سانحہ کربلا کے مختلف پہلووں کو اجاگر کیا ۔
موصولہ اطلاعات کے مطابق جموں وکشمیر میں بدھ کے روز یوم عاشورا کے موقع پر ماتمی جلوس برآمد ہوئے جن میں مردو زن، بوڑھے اور بچوں نے شرکت کی۔
سٹی رپورٹر کے مطابق زڈی بل علاقے میں ایک بڑا ماتمی جلوس برآمد ہوا جس میں لوگوں کی ایک بڑی تعداد نے شرکت کی۔
صوبائی کمشنر کشمیر وجے کمار بدھوری ، ڈپٹی کمشنر سری نگر ڈاکٹر بلال محی الدین بٹ، اے ڈی جی پی لا اینڈ آرڈر وجے کمار اور آئی جی کشمیر وی کے بردی کی موجودگی میں سری نگر میں تاریخی ماتمی جلوس برآمد ہوا جو روایتی راستوں سے ہوتے ہوئے جڈی بل پہنچا۔
بتادیں کہ جموں وکشمیر انتظامیہ نے مسلسل دوسرے سال بھی عاشورا کے موقع پر زولجنا جلوس کو روایتی راستوں پر جانے کی اجازت دی ۔
ماتمی جلوسوں میں شبیہ علم، ذوالجنا ح اور شبیہ تابوت شامل تھے جبکہ عزا دار نوحہ خوانی اور سینہ کوبی کر رہے تھے۔ جلوسوں کے راستوں پر جگہ جگہ سبیلوں اور نیاز کا اہتمام کیا گیا تھا جبکہ خون کے عطیہ کے کیمپ بھی لگائے گئے تھے۔
بوٹہ کدل لالبازار سے لے کر جڈی بل تک تل دھرنے کی بھی جگہ نہیں تھی اور پوری شاہراہ عزاداروں سے بھری پڑی ہوئی تھی۔
وسطی کشمیر کے شیعہ اکثریتی قصبہ بڈگام سے موصولہ ایک رپورٹ کے مطابق قصبے میں تاریخی ماتمی جلوس میر گنڈ سے برآمد ہوا جو اپنے روایتی راستے ڈی سی آفس روڈ سے ہوتے ہوئے بدھ کی شام دیر گئے بڈگام میں اختتام پذیر ہوگا۔
نامہ نگار نے بتایا کہ سری نگر کے بمنہ علاقے میں بھی عزاداروں نے ماتمی جلوس نکالا جس میں ہزاروں کی تعداد میں لوگوں نے شرکت کی۔
جنوبی کشمیر سے نمائندے نے اطلاع دی ہے کہ اننت ناگ، پلوامہ ، شوپیاں اور کولگام میں بھی ذولجنا کے جلوس برآمد ہوئے جو مختلف راستوں سے ہوتے ہوئے امام بارگاہ میں اختتام پذیر ہوئے۔
ایک سرکاری عہدیدار نے بتایا کہ محرم الحرام امن، محبت اور عقیدت و احترام کا مہینہ ہے، قیام امن اور مذہبی رواداری کا فروغ ہم سب کی مشترکہ ذمہ داری ہے، امن اور بھائی چارے کی فضا برقرار رکھنے میں امن کمیذٹیوں کا کردار قابل تعریف ہے۔
شمالی ضلع بارہ مولہ ، پٹن، سوپور ، بانڈی پورہ اور کپواڑہ میں بھی شیعہ آبادی الے علاقوں میں ذولجنا کےجلوس برآمد ہوئے۔
عاشورہ محرم کا دسواں دن، دنیا بھر کے مسلمانوں کے لئے گہری تاریخ اور روحانی اہمیت رکھتا ہے، یہ ہمارے نبی پاک ﷺ کے پیارے نواسے حضرت امام حسین علیہ السلام کی حق کے لئے عظیم جدوجہد، قربانی اور شہادت کا دن ہے، اس روز امام حسین علیہ السلام نے اپنے اصحاب اور اہل بیت کے ساتھ کربلا کی جنگ میں ظلم ، جبر اور نا انصافی کے خلاف ڈٹ کر مقابلہ کیا۔
یہ دن ہمیں یاد دلاتا ہے کہ ظلم و جبر کے خلاف کھڑا ہونا ایک مسلمان کا اخلاقی فرض ہے، ان کا لازوال پیغام آج ہمارے ساتھ گونجتا ہے، جو ہمیں اپنی زندگی کے تمام پہلووں میں انصاف، ہمدردی اور استقامت کے اصولوں کو برقرار رکھنے کی ترغیب دیتا ہے۔
