غزہ،: غزہ شہر میں پیر کے روز ایک اجتماع پر اسرائیلی فضائی حملے میں پانچ فلسطینی مارے گئے، جب کہ اسرائیلی فوج نے غزہ پٹی کے جنوب میں واقع مشرقی خان یونس کے رہائشیوں سے فوری طور پر نکل جانے کی اپیل کی۔
فلسطینی سیکیورٹی ذرائع نے ژنہوا کو بتایا کہ اسرائیلی طیاروں نے غزہ شہر کی الجلا اسٹریٹ پر اجتماع کو نشانہ بنایا۔ فیس بک پر گردش کرنے والے ویڈیو کلپس میں نوجوانوں کو فضائی حملے کے بعد زمین پر پڑے ہوئے دکھایا گیا ہے۔طبی ذرائع نے بتایا کہ فضائی حملے میں 5 افراد ہلاک اور 10 دیگر زخمی ہوئے، جن میں سے تمام کو ہسپتال لے جایا گیا۔
یہ حملہ اس وقت ہوا جب اسرائیلی فوج کے ترجمان اویچائی ایدرائی نے سوشل میڈیا پلیٹ فارم ایکس پر ایک پوسٹ میں خان یونس کے مشرق کے علاقوں کے رہائشیوں اور بے گھر افراد سے فوری طور پر انسانی ہمدردی کے علاقوں میں منتقل ہونے کی اپیل کی۔
پیر کے روز، غزہ کے محکمہ صحت کے حکام نے ایک پریس بیان میں کہا کہ اسرائیلی فورسز نے گزشتہ 24 گھنٹوں کے دوران 23 فلسطینیوں کو ہلاک اور 91 کو زخمی کیا، جس کے بعد اس پٹی میں فلسطینیوں اور اسرائیل کے درمیان ہونے والی لڑائی میں ہلاکتوں کی مجموعی تعداد 37,900 ہو گئی اور 87,060 افراد زخمی ہوئے۔
یو این آئی
