سری نگر:محکمہ موسمیات نے جموں و کشمیر میں 5 جولائی تک رک رک کر ہلکی سے درمیانی درجے کی بارشوں کی پیش گوئی کی ہے متعلقہ محکمے کے یک ترجمان نے بتایا کہ اگلے چوبیس گھنٹوں کے دوران جموں خطے کے بیشتر مقامات پر شام دیر گئے اور صبح کے وقت بارشوں کا امکان ہے جبکہ کشمیر میں بھی اس دوران کچھ مقامات پر بارشیں ہوسکتی ہیں یکم جولائی سے 5 جولائی تک کے موسمی حالات کے بارے میں انہوں نے کہا کہ 2 جولائی سے بارش کی شدت میں اضافہ ہوسکتا ہے اور اس دوران کئی مقامات پر رک رک کر ہلکی سے درمیانی درجے کی بارشیں متوقع ہیں۔

ان کا کہنا تھا کہ اس دوران کچھ مقامات پر بھاری بارشوں کو خارج از امکان قرار نہیں دیا جا سکتا ہے۔

انہوں نے کہا کہ کچھ مقامات پر گرج چمک کے ساتھ بارشیں ہوسکتی ہیں جبکہ بعض مقامات پر مٹی کے تودے گر آسکتے ہیں۔

دریں اثنا وادی کے شبانہ درجہ حرارت میں مزید اضافہ درج ہوا ہے۔

گرمائی دارلحکومت سری نگر میں کم سے کم درجہ حرارت19.6 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت18.3 ڈگری سینٹی گریڈ ریکارڈ ہوا تھا۔

وادی کے شہرہ آفاق سیاحتی مقام گلمرگ میں کم سے کم درجہ حرارت14.2 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت12.5 ڈگری سینٹی گریڈ ریکارڈ ہوا تھا۔

وادی کے دوسرے مشہور سیاحتی مقام پہلگام میں کم سے کم درجہ حرارت11.4 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت9.7 ڈگری سینٹی گریڈ ریکارڈ ہوا تھا۔

سرحدی ضلع کپوارہ میں کم سے کم درجہ حرارت15.8 ڈگری سینٹی گریڈ ریکارڈ کیا گیا جہاں گذشتہ شب بھی یہی درجہ حرارت ریکارڈ ہوا تھا۔

گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت15.4 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت15.2 ڈگری سینٹی گریڈ ریکارڈ ہوا تھا۔