پنجی، 04 مئی : پاکستان کے وزیر خارجہ بلاول بھٹو زرداری اور چین کے وزیر خارجہ چن گانگ شنگھائی تعاون تنظیم (ایس سی او) کے وزرائے خارجہ کی کونسل کے اجلاس میں شرکت کے لیے جمعرات کی سہ پہر گوا پہنچے وزارت خارجہ میں پاکستان، افغانستان اور ایران کے محکمہ کے انچارج جوائنٹ سیکریٹری جے پی سنگھ نے مسٹر بلاول بھٹو زرداری کا اور مشرقی ایشیا کے شعبہ کے انچارج جوائنٹ سیکریٹری مسٹر شلپک امبولے نے چینی وزیر خارجہ مسٹر چن گانگ کا استقبال کیا۔مسٹر زرداری نے پاکستان میں کراچی سے گوا روانہ ہونے سے قبل اپنے ٹویٹ میں کہا، “گوا (ہندستان) کے راستے میں۔ شنگھائی تعاون تنظیم کے وزرائے خارجہ کی کونسل میں پاکستانی وفد کی قیادت کریں گے۔ اس اجلاس میں شرکت کا میرا فیصلہ شنگھائی تعاون تنظیم کے چارٹر کے لیے پاکستان کے مضبوط عزم کی عکاسی کرتا ہے۔انہوں نے ایک اور ٹویٹ میں کہا کہ "میں اپنے دورے کے دوران، جو خاص طور پر ایس سی او پر مرکوز ہے، دوست ممالک کے اپنے ہم منصبوں کے ساتھ تعمیری بات چیت کا منتظر ہوں۔”حالانکہ ہندستانی قیادت نے پاکستانی وزیر خارجہ کے دورے پر توجہ نہ دینے کے اشارے دیے ہیں۔ میڈیا میں جاری ہونے والی تصاویر میں، جو ایس سی او کے وزرائے خارجہ کے استقبال کے وقت لی گئی ہیں، ان میں جوائنٹ سیکرٹری مسٹر امبولے چینی وزیر خارجہ چن گانگ سے مصافحہ کر رہے ہیں، لیکن پاکستانی وزیر خارجہ کے استقبال کے وقت جوائنٹ سیکرٹری جے پی سنگھ نے ان سے ہاتھ نہیں ملایا اور سپاٹ رویہ کے ساتھ کچھ فاصلے پر کھڑے رہے۔روسی وزیر خارجہ سرگئی لاوروف صبح ہی گوا پہنچ چکے ہیں۔ شنگھائی تعاون تنظیم کے وزرائے خارجہ کی کونسل کا اجلاس جمعرات اور جمعہ کو ہونا ہے۔وزیر خارجہ ایس جے شنکر آج ایس سی او کے سکریٹری جنرل کے علاوہ روس، چین اور ازبکستان کے وزرائے خارجہ کے ساتھ دو طرفہ میٹنگ کرنے والے ہیں۔ ایس سی او کے سیکرٹری جنرل نے دوپہر میں ایس سی او کے سیکرٹری جنرل ڑانگ منگ کے ساتھ اور دوپہر کے کھانے کے بعد روسی وزیر خارجہ مسٹر لاوروف کے ساتھ ملاقاتیں کیں۔ ذرائع نے بتایا کہ مسٹر ڑانگ منگ شنگھائی تعاون تنظیم کو مضبوط بنانے میں ہندوستان کے کردار کے بارے میں بہت مثبت تھے۔امکان ہے کہ وزارت خارجہ شام کو ان ملاقاتوں کے بارے میں باضابطہ معلومات دے۔
یو این آئی
