رمضان المبارک کے پہلے جمعے پر وادی کے اطرا ف واکناف میں رو ح پرور اجتماعات

رمضان المبارک کے پہلے جمعے پر وادی کے اطرا ف واکناف میں رو ح پرور اجتماعات

سری نگر،24 مارچ : ماہ مبارک رمضان کے پہلے جمعے کے موقعے پر وادی کشمیر کے تمام جامع مساجد، درگاہوں اور امام بارگاہوں میں نماز جمعہ کے انتہائی روح پرور اجتماعات منعقد ہوئے۔سب سے بڑے اجتماعات تاریخی جامع مسجد سری نگر اور درگاہ حضرت بل میں منعقد ہوئے جہاں ہزاروں کی تعداد میں فرزندان توحید نے نماز جمعہ باجماعت ادا کی۔تاریخی جامع مسجد نوہٹہ میں کسی بھی ناخوشگوار واقعے کو ٹالنے کی خاطر گلی کوچوں میں سیکورٹی فورسز کی تعیناتی عمل میں لائی گئی تھی جبکہ ڈرون کیمروں کے ذریعے لوگوں پر نگرانی کی جارہی تھی۔یو این آئی اردو کے نامہ نگار نے بتایا کہ رمضان المبارک کے پہلے جمعے کے موقعے پر وادی کشمیر کے اطراف واکناف میں روح پرور اجتماعات منعقد ہوئے ، سب سے بڑی تقریب تاریخی جامع مسجد نوہٹہ سری نگر اور درگاہ حضرت بل میں منعقد ہوئی۔انہوں نے بتایا کہ جھیل ڈل کے کناروں پر واقع آثار شریف درگاہ حضرت بل میں لوگوں کی بھاری تعداد نے نماز جمعے میں شرکت کی جس میں مرد و زن ، بچے اور بوڑھے شامل تھے۔

اس موقع پر وادی کشمیر میں امن و امان کی خاطر خصوصی دعاوں کا بھی اہتمام ہوا۔انتظامیہ نے آثار شریف درگاہ حضرت بل میں زائرین کو ہر ممکن سہولیت پہنچانے کی غرض سے تمام انتظامات کئے تھے جن میں ٹرانسپورٹ، صحت وصفائی کے علاوہ دیگر سہولیات شامل ہیں۔دریں اثنا سری نگر کے نوہٹہ علاقے میں واقع وادی کشمیر کی قدیم ترین اور تاریخی جامع مسجد میں بھی رمضان المبارک کے پہلے جمعے پر لوگوں کی بھاری تعداد نے نماز ادا کی۔علاوہ ازیں سری نگر پولیس کی جانب سے جاری کئے گئے ایک بیان میں کہا گیا ہے کہ رمضان المبارک کے پہلے جمعے پر سری نگر کی مساجد میں پ±ر امن طورپر نماز جمعہ ادا کی گئی۔بیان کے مطابق تاریخی جامع مسجد میں زائد از اٹھارہ ہزار اور آثار شریف درگاہ حضرت بل میں پچاس ہزار کے قریب روزہ داروں نے نماز جمعہ ادا کی۔

یو این آئی

Leave a Reply

Your email address will not be published.