سری نگر، 30اگست: جنوبی ضلع اننت ناگ میں فوڈ سیفٹی محکمہ نے نقلی ورکا گھی کو برآمد کرکے ضبط کیا۔
جنوبی کشمیر میں فوڈ سیفٹی ٹیم نے دو مقامات پر چھاپہ ماری کے دوران 708 کلو نقلی ورکا گھی کو برآمد کیا ہے۔
فوڈ سیفٹی انسپکٹر شبیر احمد نے بتایا کہ مصدقہ اطلاع موصول ہونے کے بعد ٹیم نے کاڑو کمپلیکس میں چھاپہ مارا جس دوران غیر معیاری اشیا فروخت کرنے والے افراد نے راہ فرار اختیار کرنے کی کوشش کی تاہم ٹیم نے اُن سے 708 کلو نقلی گھی برآمد کی۔
انہوں نے مزید کہا کہ اننت ناگ میں دو مقامات پر چھاپے مارے گئے۔
اُن کے مطابق کسی کو بھی انسانی جانوں کے ساتھ کھلواڑ کرنے کی اجازت نہیں دی جائے گی۔
موصوف انسپکٹر نے کہاکہ ملوثین کے خلاف سخت کارروائی عمل میں لانے کی سفارش کی جائے گی۔
اُن کے مطابق جنرل بس اسٹینڈ اننت ناگ میں ہول سیل ڈیلر زاہد بشیر کاڈو سے 348 کلو اور فیاض احمد ڈار اچھ بل اڈہ اننت ناگ سے 360 کلو برآمد کیا گیا۔
بتادیں کہ کشمیر میں معدے کے کینسر میں امسال غیر معمولی اضافہ دیکھنے کو ملا ہے اور اس کی بنیادی وجہ سے غیر معیاری اور زائد المیعاد کھانے پینے کی اشیاء بتائی جارہی ہیں۔
ڈاکٹروں کا کہنا ہے کہ بازاروں میں غیر معیاری اور زائد المیعاد کھانے پینے کی اشیاء فروخت کرنے کے باعث اس بیماری میں روز افزوں اضافہ ہو رہا ہے۔
انہوں نے حکام سے اپیل کی کہ ملوثین کے خلاف سخت کارروائی عمل میں لا کر اُنہیں قانون کے کٹہرے میں کھڑا کیا جائے ۔
یو این آئی
