سری نگر، 22اگست:جموں وکشمیر کے وسطی ضلع بڈگام میں پولیس اور فوج نے لشکر طیبہ سے وابستہ دو ملی ٹینٹ معاونین کو اسلحہ وگولہ بارود سمیت حراست میں لینے کا دعویٰ کیا ۔
پولیس کے ایک ترجمان نے بتایا کہ 50 آر آر، 181بٹالین سی آر پی ایف اور جموں وکشمیر پولیس نے مصدقہ اطلاع موصول ہونے کے بعد پیر کے روز بڈگام میں ملی ٹینٹوں کے دو ساتھیوں کو حراست میں لے کر اُن کے قبضے سے دو اے کے میگزین، 45 گولیوں کے راونڈ اور دوسرا قابل اعتراض مواد برآمد کرکے ضبط کیا ۔
گرفتار شدگان کی شناخت شہنواز احمد بٹ ولد عبدالعزیز بٹ ساکن کرالہ پورہ اور سمیر احمد نجار ولد غلام احمد ساکن گنڈ چیک پورہ کنی پورہ کے بطور ہوئی ہے۔
پولیس ترجمان نے بتایا کہ مذکورہ ملی ٹینٹ معاونین بڈگام میں سرگرم جنگجووں کو منطقی مدد فراہم کر رہے تھے۔
پولیس نے اس سلسلے میں کیس درج کرکے مزید تحقیقات شروع کی۔
یو این آئی
