چاڈورہ گرینیڈ حملے میں ملوث دو ہابرڈ ملی ٹینٹ گرفتار: پولیس

سری نگر، 20اگست:جموں وکشمیر پولیس نے دعویٰ کیا ہے کہ گوپال پورہ چاڈورہ میں ہوئے گرینیڈ حملے میں ملوث دو ہابرڈ ملی ٹینٹوں کی گرفتاری عمل میں لائی گئی۔
پولیس کے ایک ترجمان نے بتایا کہ پندرہ اگست کی شام کو ملی ٹینٹوں نے گوپال پورہ چاڈورہ میں رہائشی مکان پر گرینیڈ داغا جس کے نتیجے میں ایک مقامی شہری زخمی ہوا۔
انہوں نے بتایا کہ گرینیڈ حملے کے بعد پولیس نے جانچ پڑتال شروع کی جس دوران دو ہابرڈ ملی ٹینٹوں کے ملوث ہونے کے بارے میں پتہ چلا جس کے بعد دونوں کی گرفتاری عمل میں لائی گئی۔
گرفتار ہابرڈملی ٹینٹوں کی شناخت ساہل وانی اور الطاف فاروق عرف عامر کے بطور ہوئی ۔
پولیس کا کہنا ہے کہ گرینیڈ حملے کو انجام دینے کی خاطر استعمال میں لائی گئی گاڑی کو بھی ضبط کیا گیا۔
موصوف ترجمان کے مطابق اس سلسلے میں مزید تحقیقات جاری ہے۔