مرکزی داخلہ سیکرٹری نے جموںوکشمیر یوٹی میں پی ایم ڈی پی کے تحت پروجیکٹوں کی عمل آوری کا جائزہ لیا

سری نگر:مرکزی داخلہ سیکرٹری اَجے کمار بھلا نے آج ایک اعلیٰ سطحی میٹنگ میں جموںوکشمیر یوٹی کے چیف سیکرٹری اور دیگر سینئر سیکرٹریوں کے ساتھ جموںوکشمیر میں وزیر اعظم کے ترقیاتی پیکیج ( پی ایم ڈی پی ) کے تحت پروجیکٹوں کی عمل آوری کا جائزہ لیا۔
میٹنگ میں ایم او آر ٹی ایچ، وزارتِ سیاحت ، این ایچ اے آئی ، این ایچ آئی ڈی سی ایل اور بی آر او کے سینئر اَفسران نے بھی شرکت کی۔
میٹنگ میں بتایا گیا کہ پی ایم ڈی پی کے تحت 58,477کروڑ روپے کی لاگت سے کُل 53 پروجیکٹوں پر عمل کیا جارہا ہے ۔ 29 منصوبے پہلے ہی مکمل ہوچکے ہیں جبکہ 12 مزید منصوبے رواں مالی برس کے دوران مکمل کئے جائیں گے اورمزید چھ منصوبے 2023 ءکے آخیر تک مکمل ہونے کی توقع ہے۔
ڈاکٹر ارون کمار مہتا نے وادی میں کشمیر پنڈت مائیگرنٹ کے لئے 6,000 مکانات کی تعمیر کی تفصیلات بتاتے ہوئے کہاکہ زیادہ تر مکانات پر کام شد ومدسے جاری ہے ۔ اُنہوں نے کہا کہ دسمبر 2022ءتک 1,324 مکانات مکمل کئے جائیں گے اور مزید 672 مکانات اگلے سال اکتوبر تک تعمیر کئے جائیں گے ۔ اُنہوں نے یقین ظاہر کیا کہ باقی تمام ٹینیمنٹس2023 ءتک مکمل ہوجائیں گے ۔
جھیل ڈل اور نگین جھیل کی بحالی کے بارے میں بتایا گیا کہ دونوں جھیلوں کے تحفظ کے لئے 273 کروڑ روپے کی رقم سے ایک مربوط ڈی پی آر تیار کیا گیا ہے ۔
چیف سیکرٹری نے کہا کہ پروجیکٹ کی توجہ کیچ منٹ ائیریا کے واٹر مینجمنٹ کو بہتر بنانا ، گپت گنگا پر 30ایم ایل ڈی ایس ٹی پی کی تعمیر ،جھیل کے اَندر 28 بستیوں کے لئے سیوریج نیٹ ورک کا قیام اور جھیل کے علاقے کی ڈریجنگ پرمرکوزہے۔
ڈاکٹر ارون کمار مہتا نے کہا کہ جھیل ڈل کی حالت ماضی کے مقابلے آج بہت بہتر ہے جیسا کہ جھیل میں کم بی او ڈی ، ڈی او مواد اور اقدار سے ظاہر ہوتا ہے۔
اُنہوں نے مزید کہا کہ اِس برس جھیل میں250 کے قریب فوارے لگائے جائیں گے جس سے یہ ملک میں مزید پُرکشش سیاحتی مقام بن جائے گا۔
میٹنگ میں بتایا گیا کہ جموں وکشمیر میں تقریباً 10 میگاواٹ کی صلاحیت کے 23 ایس ایچ پی پروجیکٹ لگائے جائیں گے ۔ ان 23 پروجیکٹوں میں سے 6 پروجیکٹوں کی فزیبلٹی اور وائبلٹی سٹیڈی آئی آئی ٹی روڑکی سے کی جارہی ہے اور باقی 7پروجیکٹوں کو اگلے 3 ماہ میں فزیبلٹی سٹیڈی کے لئے بھیج دیا جائے گا۔
ڈاکٹر ارون کمار مہتا نے کہا کہ سودیش 1.0 کے تحت 74 پروجیکٹ مکمل ہوچکے ہیں اور سودیش درشن 2.0 کے تحت مزید پروجیکٹوں کو 3ماہ کے اَندر نظر ثانی شدہ رہنما خطوط کے مطابق منظور ی کے لئے پیش کیا جائے گا۔ سیکرٹری سیاحت جموںوکشمیر نے بتایا کہ ترقی کے لئے 75 نئے سیاحتی مقامات کی نشاندہی کی گئی ہے اور ان مقامات کی ترقی کے لئے تجاویز جلد ہی سوویش درشن 2.0 کے تحت وزارتِ سیاحت کو پیش کی جائیں گی۔
چیف سیکرٹری نے پروجیکٹ ”دریائے جہلم اور اس کی اِمداد کے لئے جامع فلد مینجمنٹ کے لئے منصوبہ مرحلہ دوم “ کے حوالے سے بتایا کہ سنگم پر دریائے جہلم کی نکاسی کی صلاحیت میں 10,000 کیوسک اِضافہ کیا گیا ہے ۔ ڈاکٹر ارون کمار مہتا نے مزید کہا کہ اِس منصوبے کے اگلے مرحلے کے تحت نکاسی آب کی گنجائش میں 60,000 کیوسک کا اِضافہ کیا جائے گا۔
چیف سیکرٹری نے عمل آوری ایجنسیوں پر زور دیا کہ وہ ان پروجیکٹوں پر کام کی رفتارکو تیز کریں کیوں کہ یہ جموںوکشمیر یوٹی کی معیشت کے لئے اہم ہے ۔ اُنہوں نے اُمید ظاہر کی کہ یہ بارہمولہ ۔ گلمرگ روڈ اور جموں۔ اکھنور روڈ پر کام وقت پر مکمل ہو جائے گا کیوں کہ ان پروجیکٹوں پر عمل در آمد کا کام آسانی سے جاری ہے۔
مرکزی داخلہ سیکرٹری اَجے کمار بھلا نے جموںوکشمیر میں پی ایم ڈی پی پروجیکٹوں کی اہمیت کا حوالہ دیتے ہوئے تمام شراکت داروں سے کہا کہ وہ ان پروجیکٹوں پر عمل آوری کو تیز کریں تاکہ انہیں مقررہ وقت کے اندر مکمل کیا جاسکے اور ان کے مطلوبہ فوائد جموںوکشمیر کے لوگوں تک پہنچ سکیں۔
چیف سیکرٹری ڈاکٹر ارون کمار مہتا نے داخلہ سیکرٹری کو یقین دِلایا کہ جموںوکشمیر یوٹی انتظامیہ پی ایم ڈی پی پروجیکٹوںکی عمل آوری میں مرکزی ایجنسیوں کو ہر ممکن تعاون فراہم کرے گی۔