انتقام گیری پر مبنی حربے کشمیریوں کو محتاج اور جموں وکشمیر کو اندھیروں میں دھکیلنے کی سازش: نیشنل کانفرنس
سرینگر//جموں وکشمیر نیشنل کانفرنس نے حکومت کی طرف سے ملازمین سے متعلق تازہ احکامات کو تاناشاہی پر مبنی قرار دیتے ہوئے کہا ہے کہ حکومتی احکامات کا مطالع کرنے سے صاف طور پر ایسا محسوس ہوتا ہے کہ یہاں جمہوریت نہیں بلکہ ڈکٹیٹرانہ نظام مسلط ہے۔
پارٹی کے ترجمان عمران نبی ڈار نے اپنے ایک بیان میں جموں وکشمیر حکومت کی طرف سے جاری کئے گئے تازہ احکامات کو یہاں کے ملازمین کی ملازمتیں چھینے کا ایک اور حربہ قرار دیتے ہوئے کہا کہ یہ سب اُس بڑے منصوبے کا حصہ ہے جس کے تحت یہاں کے لوگوں کو ہر سطح پر محتاج بنانا ہے۔
انہوں نے کہا کہ گذشتہ سال سے جاری ایسے کئی حکومتی احکامات کی رو سے چند انتظامی افسران پر مشتمل پینل کسی بھی ملازم کو برخواست کرسکتی ہے اور برطرف شدہ ملازمین کو عدالت میں اپنی بے گناہی ثابت کرنا کا بھی حق بھی نہیں دیا گیاہے۔ ترجمان نے کہا کہ کسی باشندے کو عدالت میں جانے سے روکنا ایک جمہوری نظام کا حصہ نہیں ہوسکتا۔
انہوں نے کہا کہ یہ ایک انتہائی تشویشناک رجحان ہے اور نیشنل کانفرنس ان اقدامات کی شدید الفاظ میں مذمت کرتی ہے اور اسے جموں وکشمیر کے عوام کو اندھیروں میں دھکیلنے کا ایک اور مذموم حربہ مانتی ہے۔ انہوں نے کہا کہ ملازمین کی برطرفی ایک منصوبہ بند سازش کا حصہ ہے، اس سے قبل گذشتہ سال ایک اور حکمانے کے ذریعے حکومت کو اس بات کا مجاز بنایا گیا کہ وہ ملازمین کو 48 سال کی عمر میں سبکدوش کرسکتی ہے۔
اسی منصوبے کے تحت سینکڑوں سیلف ہیلپ گروپ انجینئروں اور درجنوں سرکاری ملازمین کو برطرف کیا گیا اور گذشتہ دنوں 912آئی سی ڈی ایس ہیلپروں سے بھی نوکریاں چھین لی گئیں۔ اس طرز عمل سے صاف ظاہر ہوتا ہے کہ نئی دلی جموں و کشمیر کے عوام کو اندھیروں میں دھکیل کر محتاج بنانے پر تلی ہوئی ہے۔
عمران نبی ڈار نے کہا ایک طرف کشمیری نوجوانوں کیلئے سرکاری نوکریوں کے دروازے غیر اعلانیہ طور پر بند کردیئے گئے ہیں جبکہ دوسری جانب ملازمین کو نکالنے کا سلسلہ جاری رکھا گیا ہے۔ انہوں نے مرکزی حکومت کو خبردار کیا گیا جموں وکشمیر میں روا رکھی گئی ناانصافیوں، امتیازی سلوک اور انتقام گیری کی پالیسی کو ترک کیا جائے ۔
