سری نگر، 13 اگست (یو این آئی) کشمیر زون پولیس کے انسپکٹر جنرل وجے کمار کا کہنا ہے کہ یوم آزادی کے پیش نظر وادی کشمیر میں ہر جگہ سیکورٹی کے سخت انتظامات کئے گئے ہیں۔
انہوں نے کہا کہ وادی کے ہر ضلع ہیڈ کوارٹر پر یوم آزادی کی تقاریب کے پر امن انعقاد کو یقینی بنایا جائے گا۔موصوف آئی جی پی نے ان باتوں کا اظہار یہاں جمعے کے روز نامہ نگاروں کے ساتھ بات چیت کے دوران کیا۔
انہوں نے کہا: ’پندرہ اگست کو لے کر ہر جگہ سیکورٹی کے سخت انتظامات کئے گئے ہیں، اس سلسلے میں چیکنگ کی جا رہی ہے اور ڈرون سرویلنس کا بھی انتظام کیا گیا ہے‘۔
ان کا کہنا تھا کہ وادی کے تمام ضلع ہیڈ کوارٹروں پر یوم آزادی کی تقاریب کے پر امن انعقاد کو یقینی بنایا جائے گا۔وجے کمار نے کہا کہ لوگوں کو گھبرانے کی کوئی ضرورت نہیں ہے پاکستان امن خراب کرنے کی ایسی کوششیں کرتا رہتا ہے۔
انہوں نے کہا سیکورٹی فورسز تمام چلینجز کا مقابلہ کرنے کے لئے تیار ہیں۔قابل ذکر ہے کہ پولیس نے سری نگر اور گرد و نواح علاقوں کی فضائی نگرانی کے لئے جمعرات کو لالچوک کے نزدیک واقع پرتاب پارک میں ڈرونز کا تجربہ کیا۔
اس موقع پر پولیس کے ایک سینیئر عہدیدار کے مطابق 15 اگست کے پیش نظر سول لائنز علاقوں کی ڈرونز کے ذریعے فضائی نگرانی کی جائے گی۔
جموں وکشمیر کے لیفٹیننٹ گورنر منوج سنہا شیر کشمیر کرکٹ اسٹیڈیم میں منعقد ہونے والی یوم آزادی کی مرکزی تقریب میں پرچم کشائی کریں گے۔
یو این آئی
