جنوبی کشمیر کے ضلع شوپیاں میں ڈکیٹی، ایس بی آئی کے اے ٹی ایم اور7 دکانوں کو لوٹا گیا

سری نگر، 22 مارچ: جنوبی کشمیر کے ضلع شوپیاں میں نامعلوم لٹیروں نے دوران شب سٹیٹ بینک آف انڈیا (ایس بی آئی) کے ایک اے ٹی ایم اور7 دکانوں کو لوٹ لیا۔
سرکاری ذرائع نے تفصیلات فراہم کرتے ہوئے کہا کہ شوپیاں ضلع صدر مقام میں نامعلوم افراد نے فور وے کے نزدیک قائم سٹیٹ بینک آف انڈیا کے ایک اے ٹی ایم سے نقدی جبکہ اولڈ بس اڈے میں دو دکانوں اور باتھو چوک میں دو دکانوں اور گول چھکری میں تین دکانوں کو لوٹ لیا۔
بعض میڈیا رپورٹس کے مطابق اے ٹی ایم سے 17 لاکھ 5 ہزار 5 سو روپیے لوٹے گئے ہیں۔
ایک پولیس ترجمان نے واقعے کی تصدیق کرتے ہوئے کہا کہ نامعلوم افراد نے فور وے کے نزدیک اے ٹی ایم مشین کو توڑ کر اس میں موجود روپیے اڑا لئے۔انہوں نے بتایا کہ لٹیروں نے دکانوں کو بھی لوٹ لیا اور لوٹے گئے مال و اسباب کے نقصان کا تخمینہ لگایا جا رہا ہے۔ان کا مزید کہنا تھا کہ اس ضمن میں ایک کیس درج کیا گیا ہے اور تحقیقات جاری ہیں۔
یو این آئی ای