سری نگر، 18 اپریل:شمالی کشمیر کے ضلع بارہمولہ کے قصبہ سوپور میں ہفتہ کی شام جنگجوئوں کے حملے میں سینٹرل ریزرو پولیس فورس (سی آر پی ایف) کے تین اہلکار ہلاک جبکہ دیگر دو زخمی ہوگئے۔
سی آر پی ایف کے پی آر او پنکج سنگھ نے یو این آئی اردو کو بتایا کہ جنگجوئوں کی طرف سے سوپور کے نور باغ علاقہ میں 179 بٹالین سی آر پی ایف کی گاڑی پر اندھا دھند فائرنگ کی گئی۔ انہوں نے مزید کہا: ‘فائرنگ کے اس واقعہ میں ہمارا جانی نقصان ہوا ہے’۔
سرکاری ذرائع نے بتایا کہ جنگجوئوں نے ہفتہ کو شام کے وقت قصبہ سوپور کے نور باغ علاقہ میں احد بب کراسنگ پر کھڑی ایک سی آر پی ایف گاڑی کو نشانہ بناکر فائرنگ کی جس کے نتیجے میں کم از کم پانچ سی آر پی ایف اہلکار زخمی ہوئے۔
انہوں نے کہا کہ زخمی اہلکاروں کو سب ضلع ہسپتال سوپور لے جایا گیا جہاں ڈاکٹروں نے دو اہلکاروں کو مردہ قرار دیا۔ بعد ازاں ایک اور زخمی دم توڑ بیٹھا۔ زخمیوں کی تعداد دو بتائی جارہی ہے جن میں ایک پولیس اہلکار بھی شامل ہے۔
ایک مقامی خبر رساں ایجنسی نے پولیس سربراہ دلباغ سنگھ کے حوالے سے کہا ہے کہ سوپور میں جنگجوئوں کی طرف سے سی آر پی ایف گاڑی پر فائرنگ کی گئی جس کے نتیجے میں گاڑی کے ڈرائیور سمیت تین سی آر پی ایف اہلکار از جان ہوئے۔
سیکورٹی ذرائع نے بتایا کہ حملے کے فوراً بعد سیکورٹی فورسز نے علاقے کو محاصرے میں لیکر تلاشی آپریشن شروع کیا۔ انہوں نے مزید کہا کہ طرفین کے درمیان فائرنگ کا تبادلہ بھی ہوا تھا
