ہاپڑ میں شدید سڑک حادثہ میں 9باراتیوں کی موت، 18زخمی

ہاپڑ، :  اترپردیش میں ہاپڑ ضلع کے حافظ پور علاقہ میں ہوئے ایک شدید سڑک حادثہ میں 9باراتیوں کی موت اور 18زخمی ہوگئے۔ مرنے والوں میں بیشتر بچے ہیں۔
پولیس ذرائع نے پیر کو یہاں یہ اطلاع دی۔ انہوں نے بتایا کہ دھولانا علاقہ کے سالے پور کوٹلہ کے باشندہ مہربان کی بیٹی گلفشا کی اتوار کو شادی تھی۔ میرٹھ ضلع کے ننگلا گاوں سے بارات آئی تھی۔ شادی کے بعد باراتیوں کو لیکر دیر رات تقریباََ گیارہ بجے پک اپ گاڑی میں سوار باراتی گاوں واپس آرہے تھے کہ بلندشہر روڈ پر صادق پور گاوں کے نزدیک تیز رفتار کینٹر نے ان کی گاڑی کو ٹکر مار دی۔ ٹرک اتنی شدید تھی کہ پک اپ گاڑی پلٹ گئی اور 9لوگوں کی موقع پر ہی موت ہوگئی جبکہ 18لوگ زخمی ہوگئے۔ حادثہ کے بعد کینٹر کا ڈرائیور فرار ہوگیا۔
انہوں نے بتایا کہ اطلاع ملنے پر پولیس حکام موقع پر پہنچے۔ انہوں نے بتایا کہ زخمیوں کو الگ الگ اسپتالوں میں داخل کرایا گیا ہے۔ زخمیوں میں سے کچھ کی حالت نازک ہے۔ حادثہ اتنا شدید تھا کہ کئی لاشیں سڑک پر ہی پڑی تھیں۔
یو این آئی۔