ریاست میں آخری مرحلے کی پولنگ شروع

پلوامہ ،شوپیان اور صوبہ لداخ کے 10اسمبلی حلقوں میں ووٹنگ

ایشین میل نیوز ڈیسک؍شوکت ساحل

سرینگر:جموں وکشمیر میںآج پارلیمانی اِنتخابات 2019ءکے آخری مرحلے کے تحت 6.97لاکھ رائے دہندگان اپنے حق رائے دہی کا استعمال کریں گے۔آخری مرحلے میں لداخ پارلیمانی حلقہ اور اننت ناگ پارلیمانی حلقے کے پلوامہ ۔ شوپیاں اضلاع میں لگ بھگ 697,148 رائے دہندگان اپنے ووٹ کا استعمال کریںگے۔اِن میں 357,879مرد ،335,799خواتین ، 3,456سروس ووٹر ( 3401مرد اور 55خواتین) کے علاوہ 4خواجہ سرا شامل ہیں۔

ووٹنگ کا عمل صبح سات بجے شروع ہوا ۔جنوبی کشمیر کے دو اضلاع پلوامہ اور شوپیان میں ووٹنگ عمل سے چند گھنٹے قبل گذشتہ شام کئی علاقوں میں تشدد بھڑک اٹھا تھا ،جس دوران پولنگ پر پتھراﺅ اور فورسز کی جوابی کارروائی میں کئی افراد مضروب ہوئے تھے ۔

اطلاعات کے مطابق جنوبی کشمیر کے حساس دو اضلاع میں پولنگ کافی سست رفتاری دیکھنے کو مل رہی ہے اور اکا دکا پولنگ مرکز پر اکا دکا رائے دہند گان ہی نظر آئے ۔بیشتر پولنگ مراکز پر پولنگ عملہ وقت گذاری کرتا ہوا ہی نظر آرہا ہے ۔

اِن حلقہ انتخاب میں احسن طریقے پر اِنتخابی عمل یقینی بنانے کے لئے الیکشن کمیشن آف اِنڈیا نے اِن علاقوں میں 1254پولنگ مراکز قائم کئے ہیں۔لداخ پارلیمانی حلقے میں دو اضلاع لیہہ اور کرگل شامل ہیں ۔ کرگل ضلع کے دو اسمبلی حلقے کرگل اور زانسکار جبکہ لیہہ ضلع کے نوبرااور لیہہ اسمبلی حلقو ں پر مشتمل ہے۔

اننت ناگ پارلیمانی حلقہ کے لئے تیسرے مرحلے کے انتخابات کے آخیر پر وادی کشمیر کے دو اضلاع پلوامہ اور شوپیاں بھی اِنتخابات میں شامل ہو رہے ہیں ۔پلوامہ اور شوپیاں کے دو اضلاع 6اسمبلی حلقوں پر محیط ہےں جن میں ترال ، پانپور ، پلوامہ ، راجپورہ ،وچی اور شوپیاں علاقے شامل ہیں ۔ان اضلاع میں انتخابات احسن طریقے پر منعقد کرنے کے لئے 695پولنگ مراکز قائم کئے گئے ہیں۔اِن اضلاع میں 522,530 رائے دہندگان ہیں جن میں 271,127 مرد ، 250,735خواتین ،657سروس ووٹر ( 646مرد اور 11 خواتین ) کے علاوہ 11 خوا جہ سرا شامل ہیں۔

پلوامہ ضلع میں 351,314رائے دہندگان ہیں جن میں 181,259 مرد ، 169,508خواتین ، 541 سروس ووٹر ( 533مرد اور 8خواتین ) کے علاوہ 6خواجہ سرا ہیں۔ضلع میں شفاف اِنتخابات یقینی بنانے کے لئے ای سی آئی نے ضلع بھر میں 450پولنگ مراکز قائم کئے ہیں ۔

اسی طرح شوپیاں ضلع میں 171,216رائے دہندگان ہیں جن میں 89,868مرد ، 81,227خواتین ،116سروس ووٹر ( 113مرد اور 3خواتین ) کے علاوہ پانچ خواجہ سرا ہیں۔ضلع بھر میں 245 پولنگ مراکز قائم کئے گئے ہیں۔جو اُمیدوار چناوی دوڑ میں ہیں اُن میں نیشنل کانفرنس کے حسنین مسعودی ، بھارتی جنتا پارٹی کے صوفی یوسف ، انڈین نیشنل کانگریس کے غلام احمد میر، پی ڈی پی کی محبوبہ مفتی ، نیشنل پینتھرس پارٹی کے نثار احمد وانی، پیپلز کانفرنس کے چودھری ظفر علی ، مانو ادھیکار پارٹی کے سنجے کمار دھر ، پرگتی شیل سماج وادی پارٹی ( لوہیا ) کے سریندر سنگھ اور آزاد امید وار امتیاز احمد راتھر، رضوانہ صنم ، ریاض احمد بٹ، زبیر مسعودی ، شمس خواجہ ، علی محمد وانی ، غلام محمد وانی ، قیصر احمد شیخ ، منظور احمد خان اور مرزا سجاد حسین بیگ شامل ہیں۔

اننت ناگ پارلیمانی حلقہ کے اننت ناگ اور کولگام اضلاع میں 23 اپریل اور 29 اپریل کو اِنتخابات منعقد ہوئے۔اِن اضلاع میں ووٹنگ صبح 7بجے سے سہ پہر 4بجے تک ہوگی۔

صوبہ لداخ میں ووٹنگ

صوبہ لداخ میں پانچویں اور آخری مرحلے کی پولنگ کے تحت ووٹ ڈالے جارہے ہیں ۔ووٹنگ کا عمل سات بجے شروع ہوا ۔یہاں پولنگ مراکز پر صبح سویرے سے ہی گہما گہمی دیکھنے کو ملی ۔

لداخ حلقہ انتخاب میں 174,618ووٹر ہیں ان میں سے 86,752مرد ،85,064خواتین ،2799سروس ووٹر ( 2755مرد اور 44خواتین ) کے علاوہ تین خواجہ سرا شامل ہیں۔ای سی آئی نے پورے حلقے میں 559پولنگ مراکز قائم کئے ہیں ۔کرگل ضلع کے 87,781رائے دہندگان میں 44,057مرد ،42,405خواتین ،1,318سروس ووٹر ( 1,315مرداور تین خواتین ) کے علاوہ ایک خواجہ سرا ووٹرہے۔

اسی طر ح لیہہ ضلع کے 86,827 رائے دہندگان میں 42,695مرد ،42,659خواتین،1481سروس ووٹر ( 1440مرد اور 41خواتین) کے علاوہ دو خواجہ سرا ووٹر ہیں۔الیکشن حکام نے ضلع بھر میں انتخابات احسن طریقے منعقد کرنے کے لئے 294پولنگ مراکز قائم کئے ہیں۔ ای سی آئی نے لیہہ ( گائیک) اور نوبرا ( واشی) حلقوں میں دو پولنگ مراکز قائم کئے ہیں جہاں صرف 7رائے دہندگان موجود ہیں جبکہ لیہہ ( شینام)جہاں سب سے زیادہ 1301رائے دہندگان موجود ہےں میں بھی پولنگ مراکز قائم کئے گئے ہیں۔

اَنلےفو( چانگ تھانگ ) جو لیہہ ضلع کا سب سے زیادہ 15,000فٹ اونچائی پر واقع پولنگ مرکز قائم کیا گیا ہے۔یہ مرکز ایل اے سی سے صرف 50میٹر کی دوری پر قائم کیا گیا ہے۔جن اُمید وار وںنے اِن انتخابات میں حصہ لینے کا فیصلہ کیا ہے اُن میں انڈین نیشنل کانگریس ( آئی این سی ) کے ریگزن سپالبار ،بی جے پی کے جمیانگ ژیرنگ نمگیال اور آزاد اُمیدوار اصغرعلی کربلائی اور سجاد حسین شامل ہیں۔اِس حلقہ اِنتخاب کے لئے ووٹر ڈالنے کا وقت صبح 7بجے سے شام 6بجے تک مقرر کیا گیا ہے۔