پلوامہ، شوپیاں، 25 اگست: جنوبی کشمیر میں دو الگ الگ کارروائیوں کے دوران پانچ دہشت گرد معاونین کو گرفتار کیا گیا، جبکہ ان کے قبضے سے اسلحہ، گولہ بارود، دستی بم اور حزب المجاہدین کے پوسٹر برآمد کیے گئے۔
پلوامہ میں دو معاونین گرفتار، اسلحہ و گولہ بارود برآمد
حکام نے بتایا کہ سکیورٹی فورسز نے منگل کے روز جنوبی کشمیر کے ضلع پلوامہ میں دو دہشت گرد معاونین کو گرفتار کیا اور راج پورہ کے سی بی ناتھ کے یروان جنگلاتی علاقے میں مشترکہ کارروائی کے دوران ایک پستول، 12 گولیاں اور ایک دستی بم برآمد کیا۔
ایک عہدیدار نے بتایا کہ مشتبہ دہشت گرد معاونین کی نقل و حرکت سے متعلق مخصوص خفیہ اطلاع ملنے کے بعد پلوامہ پولیس نے فوج کی 44 راشٹریہ رائفلز اور 183 بٹالین سی آر پی ایف کے تعاون سے کارروائی شروع کی۔
انہوں نے بتایا کہ تلاشی کارروائی کے دوران مشترکہ ٹیموں نے دو افراد کو جنگلاتی علاقے سے سی بی ناتھ گاؤں کی جانب مشتبہ انداز میں جاتے ہوئے دیکھا۔
عہدیدار کے مطابق، سکیورٹی اہلکاروں نے فوری طور پر انہیں روک کر گرفتار کر لیا۔ بعد میں ان کی شناخت لطیف احمد دیداد ولد غلام محمد دیداد، ساکن لاسی دبن اور اعجاز احمد بجاد ولد نذیر احمد بجاد، ساکن بن کھا بامنو کے طور پر ہوئی۔
انہوں نے بتایا کہ ان کے قبضے سے ایک پستول، پستول کے 12 راؤنڈ اور ایک دستی بم برآمد کیا گیا۔انہوں نے مزید کہا کہ برآمدگی کے سلسلے میں پولیس اسٹیشن راج پورہ میں آرمز ایکٹ اور غیر قانونی سرگرمیاں (روک تھام) ایکٹ کی متعلقہ دفعات کے تحت مقدمہ درج کر کے مزید تحقیقات شروع کر دی گئی ہیں۔
شوپیاں میں تین گرفتار، دستی بم اور حزب المجاہدین کے پوسٹر برآمد
سکیورٹی فورسز نے منگل کے روز جنوبی کشمیر کے ضلع شوپیاں میں ناکہ چیکنگ کے دوران تین افراد کو گرفتار کیا اور ان کے قبضے سے دو دستی بم اور حزب المجاہدین (ایچ ایم) کے مبینہ نشانات والے پانچ پوسٹر برآمد کیے۔
ایک عہدیدار نے بتایا کہ ناکہ چیکنگ کے دوران تینوں افراد کو ایک موٹر سائیکل سمیت گرفتار کیا گیا۔انہوں نے ان کی شناخت جنید احمد ڈار، عامر یوسف اور جنید مظفر کے طور پر کی، جو سبھی ضلع کولگام کے رہائشی ہیں۔
انہوں نے مزید بتایا کہ برآمد شدہ مواد کو تحویل میں لے لیا گیا ہے جبکہ مزید تحقیقات جاری ہیں۔ — (کے این او)
