سرینگر، : حکام نے بتایا کہ ہفتہ کی علی الصبح شدید بارش کے باعث جنوبی کشمیر کے ضلع شوپیان کے مختلف علاقوں میں سیلابی صورتحال پیدا ہوگئی، جس کے نتیجے میں متعدد مکانات اور ایک اسکول زیرِ آب آگئے، جبکہ ضلع کشتواڑ میں بادل پھٹنے کے واقعے سے املاک کو نقصان پہنچا اور قومی شاہراہ 244 کے چھاترو۔کشتواڑ حصے کو بند کر دیا گیا۔
ایک سرکاری عہدیدار نے کشمیر نیوز آبزرور (کے این او) کو بتایا کہ شوپیان کے پہلی پورہ گاؤں میں بارش کا پانی متعدد گھروں میں داخل ہوگیا، جس سے معمولاتِ زندگی متاثر ہوئے اور پولیس، اسٹیٹ ڈیزاسٹر ریسپانس فورس (ایس ڈی آر ایف) اور ضلعی انتظامیہ نے فوری طور پر امدادی کارروائیاں شروع کیں۔
انہوں نے کہا کہ اطلاع ملتے ہی امدادی ٹیمیں متاثرہ علاقے میں پہنچ گئیں اور انخلا و راحت رسانی کی کارروائیاں شروع کر دیں۔ انہوں نے کہا، "جمع شدہ پانی کی نکاسی، ضرورت پڑنے پر متاثرہ خاندانوں کو محفوظ مقامات پر منتقل کرنے اور نقصانات کا جائزہ لینے کا عمل جاری ہے۔”
عہدیدار کے مطابق سیلاب سے متعدد مکانات اور ایک اسکول متاثر ہوئے ہیں۔ادھر، شدید بارش کے بعد آج علی الصبح تقریباً ڈھائی بجے ضلع کشتواڑ کے چھاترو علاقے میں بادل پھٹنے کا واقعہ پیش آیا، جس سے کئی ڈھانچوں کو نقصان پہنچا اور متعدد گاڑیاں سیلابی ریلے میں بہہ گئیں۔
حکام نے بتایا کہ اس واقعے میں کسی جانی نقصان یا زخمی ہونے کی اطلاع نہیں ملی۔ احتیاطی اقدام کے طور پر قومی شاہراہ 244 کے چھاترو۔کشتواڑ حصے پر گاڑیوں کی آمدورفت معطل کر دی گئی ہے۔
پولیس، سول انتظامیہ اور دیگر ہنگامی خدمات انجام دینے والے ادارے متاثرہ علاقوں میں پہنچ چکے ہیں اور نقصانات کے تخمینے اور بحالی کے کام کا آغاز کر دیا گیا ہے۔
شدید بارش اور خراب موسمی حالات کے پیشِ نظر حکام نے ضلع رام بن اور کشتواڑ کے تمام سرکاری اور نجی اسکول آج کے لیے بند رکھنے کے احکامات جاری کیے ہیں۔
چیف ایجوکیشن آفیسر (سی ای او) رام بن نے بتایا کہ ضلعی انتظامیہ کی ہدایت پر ضلع بھر کے تمام اسکول ہفتہ کے روز بند رہیں گے۔ تمام اداروں کے سربراہان کو ہدایت دی گئی ہے کہ تعلیمی سرگرمیوں کا تسلسل برقرار رکھنے کے لیے مناسب ڈیجیٹل پلیٹ فارمز کے ذریعے آن لائن کلاسز کا انعقاد کیا جائے۔
اسی نوعیت کا ایک حکم چیف ایجوکیشن آفیسر (سی ای او) کشتواڑ اور ڈوڈہ نے بھی جاری کیا، جس میں شدید بارش، پھسلن والی سڑکوں اور پہاڑوں سے پتھر گرنے کے خدشے کو طلبہ اور عملے کی سلامتی کے لیے خطرہ قرار دیتے ہوئے ضلع بھر کے تمام اسکول بند رکھنے کا اعلان کیا گیا۔ اس دوران تمام اسکولوں کو آن لائن کلاسز منعقد کرنے کی ہدایت بھی دی گئی ہے۔
(کے این او)
