رام بن، 22 جولائی: ضلع رام بن کے رامسو علاقے میں بدھ کے روز مسلسل بارش کے دوران جموں۔سرینگر قومی شاہراہ پر ایک مسافر ٹیمپو پر پہاڑی سے بڑے پتھر آ گرے، جس کے نتیجے میں دو افراد جاں بحق جبکہ پانچ دیگر زخمی ہو گئے۔
حکام نے بتایا کہ مسلسل بارش کے دوران اچانک چٹانیں کھسک آئیں اور مسافر ٹیمپو سے ٹکرا گئیں، جس سے گاڑی کو شدید نقصان پہنچا اور اس میں سوار کئی مسافر زخمی ہو گئے۔
حادثے کے فوراً بعد پولیس، ریسکیو ٹیموں اور مقامی رضاکاروں نے مشترکہ طور پر امدادی کارروائی شروع کی اور زخمیوں کو نکال کر پرائمری ہیلتھ سینٹر (PHC) رامسو اور قریبی اسپتالوں میں منتقل کیا۔
حکام کے مطابق زخمیوں میں سے دو افراد زخموں کی تاب نہ لاتے ہوئے دم توڑ گئے، جبکہ دیگر پانچ زخمیوں کا علاج جاری ہے اور ان کی حالت پر مسلسل نظر رکھی جا رہی ہے۔
جاں بحق افراد کی شناخت کا عمل جاری ہے، جبکہ پولیس نے واقعے کی تحقیقات شروع کر دی ہیں۔
