بڈگام، 22 جولائی: ضلع بڈگام کے علاقے کھاگ میں گزشتہ روز سیلابی نالے میں بہہ جانے والے نو بیاہتا نوجوان کی لاش بدھ کی صبح رات بھر جاری رہنے والے وسیع تلاشی آپریشن کے بعد اشریہ نالہ سے برآمد کر لی گئی۔
متوفی کی شناخت شبیر احمد پسوال ساکن درنگ، کھاگ کے طور پر ہوئی ہے۔حکام کے مطابق مسلسل موسلا دھار بارش کے باعث نالے میں اچانک پانی کی سطح بلند ہو گئی، جس کے نتیجے میں شبیر احمد تیز بہاؤ کی زد میں آ کر بہہ گئے تھے۔
واقعے کے فوراً بعد سول انتظامیہ، پولیس اور امدادی اداروں نے مشترکہ طور پر بڑے پیمانے پر ریسکیو آپریشن شروع کیا۔ کئی گھنٹوں کی مسلسل کوششوں کے بعد مقامی لوگوں، تحصیلدار کھاگ، ایس ایچ او کھاگ مدثر احمد، ریسکیو اہلکاروں، رضاکاروں اور نوجوانوں کی مشترکہ کوششوں سے لاش برآمد کر لی گئی۔
ادھر مسلسل بارش کے باعث بڈگام کے کئی علاقوں میں سیلابی صورتحال پیدا ہو گئی ہے۔ متعدد دیہات زیرِ آب آ گئے ہیں، بنیادی ڈھانچے کو نقصان پہنچا ہے اور دریاؤں و ندی نالوں میں طغیانی کے باعث انتظامیہ نے ہنگامی اقدامات مزید تیز کر دیے ہیں۔
بڈگام پولیس نے عوام سے ایک بار پھر اپیل کی ہے کہ وہ غیر ضروری سفر سے گریز کریں اور دریاؤں، ندی نالوں، بندھوں اور سیلاب سے متاثرہ مقامات کے قریب جانے سے اجتناب کریں۔ پولیس نے ہنگامی صورتحال سے نمٹنے کے لیے چوبیس گھنٹے فعال ایمرجنسی ہیلپ لائنز بھی قائم کی ہیں تاکہ ضرورت مندوں کو فوری مدد فراہم کی جا سکے۔
والدین کو ہدایت دی گئی ہے کہ وہ بچوں کو کھلے نالوں، پلوں اور تیز بہاؤ والے پانی سے دور رکھیں، جبکہ عوام سے بھی کہا گیا ہے کہ وہ پانی کی بڑھتی ہوئی سطح دیکھنے یا تصاویر لینے کے لیے آبی ذخائر کے قریب جمع نہ ہوں، کیونکہ اچانک بدلتا ہوا بہاؤ جان لیوا ثابت ہو سکتا ہے۔
قبل ازیں ڈپٹی کمشنر بڈگام نے تمام متعلقہ محکموں کو ہائی الرٹ رہنے کی ہدایت دیتے ہوئے پولیس، ایس ڈی آر ایف، سول ڈیفنس، فائر اینڈ ایمرجنسی سروسز اور دیگر امدادی اداروں کو فوری طور پر متحرک کرنے کے احکامات جاری کیے تھے۔ انہوں نے حساس مقامات پر مسلسل نگرانی رکھنے اور کسی بھی ہنگامی صورتحال میں فوری کارروائی کو یقینی بنانے کی بھی ہدایت دی۔
ڈپٹی کمشنر نے عوام سے انتظامیہ کے ساتھ تعاون کرنے، انتہائی ضرورت کے بغیر گھروں سے باہر نہ نکلنے، سیلابی نالوں، ٹوٹے ہوئے حفاظتی بندھوں اور حساس علاقوں سے دور رہنے اور پولیس و سول انتظامیہ کی جانب سے جاری حفاظتی ہدایات پر سختی سے عمل کرنے کی اپیل کی۔
حکام کے مطابق مسلسل شدید بارش کے دوران انسانی جانوں اور املاک کے تحفظ کے لیے تمام محکمے باہمی رابطے کے ساتھ امدادی اور حفاظتی اقدامات جاری رکھے ہوئے ہیں۔
کے این ٹی
