جموں، 20 جولائی: وزیر اعلیٰ عمر عبداللہ نے راجوری اور پونچھ اضلاع میں قدرتی آفات سے متعلقہ حادثات میں جاں بحق ہونے والے ہر فرد کے لواحقین کے لیے 6 لاکھ روپے کی ایکس گریشیا امداد کا اعلان کیا ہے۔ یہ امداد متاثرہ خاندانوں کو فوری مالی معاونت فراہم کرنے کے مقصد سے منظور کی گئی ہے۔
وزیر اعلیٰ نے اچانک آنے والے سیلاب، تودے گرنے اور دیگر قدرتی آفات سے متعلقہ حادثات میں قیمتی انسانی جانوں کے ضیاع پر گہرے رنج و غم کا اظہار کرتے ہوئے کہا کہ کوئی بھی مالی امداد متاثرہ خاندانوں کو پہنچنے والے ناقابل تلافی نقصان کا ازالہ نہیں کر سکتی، تاہم حکومت اس مشکل وقت میں سوگوار خاندانوں کے ساتھ مضبوطی سے کھڑی ہے۔
وزیر اعلیٰ نے کہا، "پونچھ اور راجوری میں گزشتہ روز آنے والے تباہ کن سیلاب، لینڈ سلائیڈنگ اور دیگر قدرتی آفات سے متعلقہ حادثات کے نتیجے میں ہونے والے جانی نقصان کی تلافی کسی بھی مالی امداد سے ممکن نہیں، تاہم فوری مدد کے طور پر ہر جاں بحق شخص کے قریبی رشتہ دار کو 6 لاکھ روپے کی ایکس گریشیا امداد فراہم کی جائے گی۔”
اعلان کردہ امدادی پیکیج میں 4 لاکھ روپے اسٹیٹ ڈیزاسٹر ریسپانس فنڈ (SDRF) جبکہ 2 لاکھ روپے وزیر اعلیٰ ریلیف فنڈ (CMRF) سے فراہم کیے جائیں گے۔
یہ اعلان وزیر اعلیٰ کی زیر صدارت اتوار کی شام منعقدہ اعلیٰ سطحی جائزہ اجلاس کے بعد کیا گیا، جو راجوری اور پونچھ اضلاع میں آنے والے تباہ کن سیلاب اور دیگر قدرتی آفات سے متعلقہ واقعات کے تناظر میں طلب کیا گیا تھا۔ ان حادثات کے نتیجے میں کئی افراد جاں بحق ہوئے جبکہ سرکاری اور نجی املاک کو بڑے پیمانے پر نقصان پہنچا۔
اجلاس کے دوران وزیر اعلیٰ نے انتظامیہ کو ہدایت دی کہ متاثرہ خاندانوں کو فوری امداد اور بحالی کی سہولیات فراہم کی جائیں اور تمام ممکنہ مدد بغیر کسی تاخیر کے ان تک پہنچائی جائے۔
انہوں نے متعلقہ محکموں کے درمیان بہتر تال میل پر زور دیتے ہوئے کہا کہ متاثرہ علاقوں میں ضروری خدمات کی بحالی اور امدادی کارروائیوں کو تیز کیا جائے تاکہ متاثرین کو ہر ممکن سہارا فراہم کیا جا سکے۔
